निजी विद्यालयका शिक्षकलाई समेत हड्ताल गर्न नपाउने प्रावधान आवश्यक : सांसद श्रेष्ठ

काठमाडौं, भदौ ५ – राष्ट्रिय स्वतन्त्र पार्टीकी सांसद सुमना श्रेष्ठले विद्यालय र विश्वविद्यालय कुनै कारणवश पनि बन्द गर्न नपाइने व्यवस्था विधेयकमा स्पष्ट रूपमा उल्लेख गर्नुपर्ने बताएकी छन्।

बिहीबार सिंहदरबारमा बसेको शिक्षा, स्वास्थ्य तथा सूचना प्रविधि समितिको बैठकमा उनले विद्यालय शिक्षा निरन्तरता विद्यार्थीको मौलिक हक भएको भन्दै त्यसमा कसैले हस्तक्षेप गर्न नहुने धारणा राखिन्।

श्रेष्ठले हालको विधेयकमा शिक्षकहरूले बन्द–हड्ताल गर्न नपाउने व्यवस्था गरिएको भए पनि निजी विद्यालयमा कार्यरत शिक्षकलाई समेत सोही प्रावधान लागू गर्नुपर्ने आवश्यकता औंल्याइन्।

‘विद्यालय वा विश्वविद्यालयमा तालाबन्दी गर्ने अधिकार अब कसैलाई दिनु हुँदैन,’ उनले भनिन्, ‘विद्यार्थीको हकमा आघात पुग्ने काम कुनै पनि कारण देखाएर गर्न मिल्दैन।’

उनले अनिवार्य निःशुल्क शिक्षा सबैले पाउनुपर्ने संवैधानिक ग्यारेन्टीलाई कार्यान्वयन गर्ने दिशा विधेयकले देखाउनुपर्नेमा जोड दिइन्।

उक्त समितिमा बिहीबार विद्यालय शिक्षा विधेयक, २०८० सम्बन्धी प्रतिवेदनबारे छलफल जारी छ।