शिक्षा विधेयकविरुद्ध निजी विद्यालयका शिक्षक–प्रधानाध्यापक सडकमा

काठमाडौं, भदौ ५ – सरकारले ल्याएको विद्यालय शिक्षासम्बन्धी विधेयकप्रति आपत्ति जनाउँदै निजी विद्यालयका शिक्षक तथा प्रधानाध्यापकहरूले आन्दोलन सुरु गरेका छन्। आफ्ना मागलाई बेवास्ता गरिएको भन्दै उनीहरूले आज (बिहीबार) माइतीघर मण्डलामा प्रदर्शन गरेका हुन्।

संसद्को शिक्षा, स्वास्थ्य तथा प्रविधि समितिमा विधेयक पारित गर्ने तयारी भइरहेका बेला उनीहरूले आन्दोलनलाई चरणबद्ध रुपमा अघि बढाउने घोषणा गरेका छन्। आन्दोलनकारीले चेतावनी दिँदै भनेका छन्– माग सम्बोधन नभए भदौ ९ गतेबाट देशभरका विद्यालय बन्द गर्नेछन्।

आन्दोलन अन्तर्गत भदौ ६ गते देशभरका विद्यालय बसमा कालो झण्डा झुण्ड्याएर नगर परिक्रमा गर्ने, काठमाडौंमा र्‍याली गर्ने र संसद घेराउ गर्ने कार्यक्रम तय गरिएको छ।

निजी विद्यालयका चार छाता संगठन– प्याब्सन, एनप्याब्सन, हिसान र अपेनले संयुक्त वक्तव्य जारी गर्दै विधेयकमा रहेका केही प्रावधान सच्याउनुपर्ने माग राखेका छन्। उनीहरूको मुख्य आपत्ति ‘निजी विद्यालयलाई गैरनाफामूलक बनाउने’ भनाइ, ‘पूर्ण छात्रवृत्ति’ सम्बन्धी व्यवस्था, विद्यालयहरूले पोसाक, स्टेशनरी, खाजा उपलब्ध गराउने अनिवार्य प्रावधान र छात्रवृत्ति वितरणको अधिकार विद्यालयबाट खोस्ने प्रस्तावमा छ।

छाता संगठनहरूले छात्रवृत्ति वितरण सम्बन्धी अधिकार विद्यालयकै जिम्मेवारीमा रहनुपर्ने र पालिकाको प्रतिनिधिसहितको पारदर्शी समिति मार्फत मात्र वितरण गर्न सकिने व्यवस्था मिलाउनुपर्ने बताएका छन्। साथै, छात्रवृत्ति र आरक्षणसम्बन्धी पुराना कानूनी व्यवस्था खारेज गर्नुपर्ने उनीहरूको जोड छ।

सरकारले विधेयक यथास्थितिमा अघि बढाए आन्दोलन थप चर्काउने चेतावनी पनि आन्दोलनकारी शिक्षक र प्रधानाध्यापकहरूले दिएका छन्।