राप्रपाको कडाइ : सिद्धान्तविपरीत अभिव्यक्तिमा रोक

काठमाडौं, साउन ३ – राष्ट्रिय प्रजातन्त्र पार्टी (राप्रपा)ले आफ्ना नेता तथा कार्यकर्तामाथि पार्टीको सिद्धान्त र नीतिविपरीत सार्वजनिक रूपमा अभिव्यक्ति दिन नपाउने निर्देशन जारी गरेको छ।

पार्टी प्रवक्ता तथा प्रचार विभाग प्रमुख मोहन श्रेष्ठद्वारा जारी विज्ञप्तिमा सामाजिक सञ्जाल र सञ्चारमाध्यममा लेख्दा वा बोल्दा पार्टीको हित र सिद्धान्तको उल्लंघन हुने कुनै पनि गतिविधिमा संलग्न नहुन आग्रह गरिएको छ।

श्रेष्ठले स्पष्ट पारेका छन् कि पार्टीको नीति, विचार र सिद्धान्तको विरोध हुने अभिव्यक्ति नदिन तथा त्यस्ता क्रियाकलापबाट सबै तहका नेता–कार्यकर्ताहरूले टाढा रहनुपर्नेछ।

पछिल्ला दिनमा राप्रपाभित्र अध्यक्ष राजेन्द्र लिङ्देनविरुद्ध खुला आलोचना हुन थालेपछि पार्टीले अनुशासन कडाइ गर्न थालेको हो। कतिपय नेताहरूले प्रेस विज्ञप्तिमार्फत नेतृत्वप्रति असन्तुष्टि जनाएका थिए।

यही क्रममा अध्यक्ष लिङ्देनले शुक्रबार मुकुन्दश्याम गिरीलाई पार्टी उपाध्यक्ष र केन्द्रीय सदस्य पदबाट हटाएका छन्। गिरीले सार्वजनिक रूपमा अध्यक्षविरुद्ध धारणा राखेपछि उनलाई पदमुक्त गरिएको हो।

राप्रपाको अनुशासन समितिले पनि यसअघि नै सबैलाई पार्टी नीति र अनुशासन पालन गर्न निर्देशन दिइसकेको छ। पार्टीभित्रको आन्तरिक विवाद चुलिँदै गएको बेला आएको यो निर्णयलाई आलोचकहरू ‘विरोध दबाउने प्रयास’का रूपमा पनि हेरेका छन्।