विदेशिए गोरखाका वडाध्यक्ष सरोज लामा, राजनीति छाड्ने घोषणा

गोरखा, भदौ ११ – माओवादी केन्द्रबाट निर्वाचित गोरखाको चुमनुब्री गाउँपालिका–६ का वडाध्यक्ष सरोज लामा रोजगारीको खोजीमा जर्मनी प्रस्थान गरेका छन्।

त्रिभुवन अन्तर्राष्ट्रिय विमानस्थलबाट विदेशिने क्रममा लामाले सामाजिक सञ्जालमार्फत् राजनीति जीवनलाई अन्त्य गर्दै नयाँ सुरुवात गर्न लागेको सार्वजनिक गरेका छन्। उनले लेखेका छन्, “ईमान्दारीका साथ भूमिका निर्वाह गर्दा पनि कहिल्यै आत्मसन्तुष्टि प्राप्त भएन, त्यसैले अब राजनीति बाट पूर्ण विराम लगाएर जिन्दगीलाई फेरि शून्यबाट सुरु गर्दैछु।”

लामाले आफ्नो अनुपस्थितिमा वडा सदस्य ठिन्ले घ्याम्छो लामालाई कार्यवाहक वडाध्यक्ष तोकेका छन्।

प्रमुख प्रशासकीय अधिकृत मनोज लामिछानेले भने, लामा स्वदेश नफर्कने जानकारी आएको तर उनले अझै औपचारिक राजीनामा पत्र बुझाउन बाँकी रहेको बताए।