गोरखामा बेपत्ता भेटिएका पुरुषको शव, खोजीमा संलग्न अर्काको पनि मृत्यु

गोरखा, भदौ ५ – गोरखाको उत्तरी क्षेत्र चुमनुब्री गाउँपालिका–६ सिप्चेतका ४३ वर्षीय रिनजिन लामा मृत अवस्थामा फेला परेका छन्।

सोमबार बिजुलीको बिल तिर्न घरबाट निस्केका लामा त्यही दिनदेखि सम्पर्कविहीन बनेका थिए। बिहीबार बिहान करिब ९ बजेतिर गोरेटो बाटोभन्दा करिब १५० मिटर तल बुट्यानमा उनको शव स्थानीयले देखेर प्रहरीलाई जानकारी गराएका हुन्।

गोरखा प्रहरीका डीएसपी इन्द्रप्रसाद सुवेदीका अनुसार शव भेटिएको खबर आफन्तलाई सुनाउन गएका स्थानिय हिसे दोर्जे पनि भिरबाट खस्दा ज्यान गुमाएका छन्।

“लामाको खोजीमा उनी पनि संलग्न थिए। तर आफन्तलाई खबर गर्न गएका बेला दुर्घटनामा परी घटनास्थलमै मृत्यु भयो,” डीएसपी सुवेदीले भने।

घटनाबारे थप अनुसन्धानका लागि गोरखा सदरमुकामबाट प्रहरी निरीक्षक सरोज कार्की नेतृत्वको टोली खटाइएको प्रहरीले जनाएको छ। सदरमुकामबाट घटनास्थल पुग्न करिब दुई दिन लाग्ने बताइएको छ।