झलनाथ खनालको माग : चीन–भारत लिपुलेक सम्झौता खारेज गर्नुपर्छ

काठमाडौँ, भदौ  ६ – पूर्वप्रधानमन्त्री तथा नेकपा (एकीकृत समाजवादी) का वरिष्ठ नेता झलनाथ खनालले चीन र भारतबीच भएको लिपुलेकमार्ग व्यापारसम्बन्धी सम्झौता तत्काल खारेज गर्न माग गरेका छन् ।

३ भदौमा जारी विज्ञप्तिमार्फत उनले दिल्लीमा सम्पन्न १२ बुँदे सम्झौतामध्ये ९ औँ बुँदाले नेपालको सार्वभौमिकता र अखण्डतामाथि गम्भीर धक्का पुर्‍याएको बताए । उक्त बुँदामा लिपुलेक पास प्रयोग गरी चीन–भारतबीच व्यापार पुनः सुरु गर्ने सहमति भएको थियो ।

खनालले भने, “यो सम्झौता नेपालको भूमि अतिक्रमण मात्र होइन, सम्पूर्ण नेपाली जनताको देशभक्तिपूर्ण भावनामाथि चोट हो । यसविरुद्ध देशभित्र र प्रवासमा रहेका नेपालीहरू सडकमा उत्रिन बाध्य भएका छन् ।”

उनले संसद्मार्फत सबै दलले एउटै आवाजमा राष्ट्रिय सङ्कल्प प्रस्ताव पारित गर्नुपर्नेमा जोड दिए । साथै उनले राजनीतिक दल, देशभक्त संघसंस्था र आम नागरिकलाई राष्ट्रिय स्वाधीनता र सार्वभौमसत्ताको पक्षमा एकजुट हुन आग्रह गरे ।

खनालले भारतीय विस्तारवादी नीतिलाई खारेज गर्न पनि आह्वान गर्दै ऐतिहासिक सन्धि, सम्झौता, नक्सा, अभिलेख र प्रमाणलाई व्यवस्थित गरेर नेपालले आफ्नो भू–भागको यथार्थ विश्वसामु स्पष्ट पार्नुपर्ने बताए ।