ओलीको स्पष्टीकरण : “विद्या भण्डारीको सदस्यता खोसिएको होइन”

काठमाडौं, भदौ ६ – नेकपा (एमाले) का अध्यक्ष तथा प्रधानमन्त्री केपी शर्मा ओलीले पूर्वराष्ट्रपति विद्यादेवी भण्डारीको पार्टी सदस्यता खोसिएको भन्ने हल्ला निराधार भएको बताएका छन्।

शुक्रबार पार्टी कार्यालयमा आजपाका नेता तथा कार्यकर्तालाई एमाले प्रवेश गराउने कार्यक्रममा ओलीले भण्डारीको सदस्यता आफैंले छोडिएको भन्दै अब नवीकरण गर्न नसक्ने स्पष्ट पारे।

‘पूर्वराष्ट्रपतिको सदस्यता खोसेको होइन, उहाँले छाडेको हो,’ ओलीले भने, ‘सदस्यता छाडिसकेपछि नवीकरण हुने व्यवस्था हुँदैन, रहेको सदस्यता मात्रै नवीकरण हुन्छ।’

उनका अनुसार पार्टीभित्र कतिपयले यो विषयमा भ्रम फैलाइरहेको भए पनि कुनै आधार नभएको बताए। ओलीले दुईपटक राष्ट्रपति भइसकेकी नेताबाट यसरी विवाद सिर्जना हुने कल्पना समेत नगरेको टिप्पणी गरे।

त्यसैगरी उनले भण्डारी चुनाव हारेका केही नेताहरुलाई भेला गराएर पार्टीभित्र असन्तुष्टि बढाउने गतिविधि गरिरहेको भन्दै आलोचना गरे। ओलीले भने, ‘मदन भण्डारीको जन्मदिन मनाउने नाममा अहिले नै पार्टीविरुद्ध जमात खडा गर्ने कार्य गरिएको छ, जुन पार्टी एकताको लागि राम्रो होइन।’