आफैं विप्लव घर पुगे प्रचण्ड, धानखेती पनि हेरे

काठमाडौं, भदौ ९ – नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा महासचिव नेत्रविक्रम चन्द ‘विप्लव’बीच सोमबार बिहान हरिसिद्धीमा भेटवार्ता भएको छ। करिब ५० मिनेटसम्म भएको छलफललाई दुवै पक्षले सकारात्मक रुपमा लिएको बताइएको छ।

सामान्यतया विप्लव प्रचण्ड निवास पुग्ने गरेका भए पनि यसपटक भने प्रचण्ड आफैं विप्लवलाई भेट्न घरमै पुगे। विप्लव निवासमा नेता–कार्यकर्ताले स्वागत गरे भने मुख्य ढोकामै विप्लवले प्रचण्डलाई अभिवादन गर्दै भित्र लगेका थिए।

कार्यकक्षमा बसेर भएको छलफलपछि विप्लवले प्रचण्डलाई धानखेती देखाउँदै विदाइ गरेका थिए। त्यस क्रममा प्रचण्डले उत्पादनमूलक अभियानलाई महत्व दिँदै नेकपाको प्रयासको प्रशंसा गरेका थिए।

भेट प्रचण्डको पहलमा भएको हो। उनका प्रमुख स्वकीय सचिव गोविन्द आचार्यका अनुसार, दुवै नेताबीच देशको वर्तमान राजनीतिक स्थिति, समाजवादी मोर्चाको भूमिका र माओवादी केन्द्र–नेकपा बीचको सम्भावित एकता प्रक्रियाबारे चर्चा भएको छ।

माओवादी केन्द्रको स्थायी समिति बैठकले हालै मात्रै विप्लव नेतृत्वको नेकपासँग एकता प्रक्रिया अघि बढाउने निर्णय गरेको थियो। त्यसै निर्णयलाई कार्यान्वयनतर्फ लैजाने सन्दर्भमा सोमबारको भेटलाई महत्वपूर्ण संकेतका रूपमा हेरिएको छ।