काठमाडौँ महानगरविरुद्ध कबाड व्यवसायीको विरोध प्रदर्शन जारी

काठमाडौँ, भदौ ११ – कबाड व्यवसायीहरूले बुधबार काठमाडौँ महानगरपालिका विरुद्ध तेस्रो दिन पनि आन्दोलन जारी राखेका छन्। भृकुटीमण्डपबाट सुरु भएको प्रदर्शन कमलादीस्थित महानगरको कार्यालयसम्म पुगेको थियो र प्रदर्शनकारीहरूले महानगर घेराउ गरेका थिए।

कबाड व्यवसायी सङ्घर्ष समितिका अध्यक्ष रामकेवल गुप्ताका अनुसार, सर्वोच्च अदालतको आदेश विपरीत व्यवसायीमाथि गरिएको ज्यादतीको विरोधमा उनीहरूले शान्तिपूर्ण आन्दोलन सुरु गरेका हुन्। उनले भने, “महानगर प्रमुख बालेन्द्र शाहले कानुनको पालना नगरेसम्म आन्दोलन जारी रहनेछ।”

आन्दोलनमा सहभागीहरूले सर्वोच्च अदालतको आदेश पालना गर्न, व्यवसायीमाथि हुने अत्याचार रोक्न र बालेनको गुण्डागर्दी बन्द गर्न माग गर्दै नाराबाजी गरेका थिए। आम सुकुम्बासी र अव्यवस्थित बसोबास मोर्चाले पनि आन्दोलनलाई समर्थन जनाएको छ।

व्यवसायीहरूले पाँच बुँदे माग राखेका छन्: व्यवसाय गर्ने अधिकार सुनिश्चित गर्न, कुटपिट–अपहरण रोक्न, प्रहरी कारबाही गर्न, जिउ–धनको सुरक्षा गर्न र विगत क्षतिको क्षतिपूर्ति दिन सरकारलाई आग्रह गर्नु।