भक्तपुर र ललितपुरका सडक पोलमा पनि ‘स.वि.’ लेखिँदै

काठमाडौं, भदौ १४ – काठमाडौँका सडक पोलमा ‘स.वि.’ लेखेर आफ्नो क्षेत्राधिकार जनाउँदै आएको सडक डिभिजन विभागले अब भक्तपुर र ललितपुरमा पनि सो कार्य विस्तार गर्ने भएको छ।

शुक्रबार काठमाडौंमा भएको समन्वय समितिको बैठकमा विभागका महानिर्देशकसहित सम्बन्धित निकायका प्रतिनिधिहरूको उपस्थितिमा यो निर्णय गरिएको हो। एक महिनाभित्र भक्तपुर र ललितपुरका सडक पोलमा समेत ‘स.वि.’ लेखिसक्ने तयारी विभागले जनाएको छ।

यसअघि काठमाडौं महानगरपालिकाका मेयर बालेन्द्र शाहले सडक विभागको यो गतिविधिलाई व्यंग्य गर्दै सामाजिक सञ्जालमा प्रतिक्रिया दिएका थिए। शाहले “स.वि. जीवन यस्तो होस्…” भन्दै व्यङ्ग्यात्मक शैलीमा स्टाटस लेखेपछि यो विषयले थप चर्चा पाएको थियो।

बैठकमा सडकलाई खाल्डाखुल्डीमुक्त बनाउन, फुटपाथमा पैदल यात्रुका अवरोध हटाउन तथा अन्य सुधारात्मक काम गर्न सहमति गरिएको छ। साथै अबदेखि समन्वय समितिको बैठक प्रत्यक्ष प्रसारण गर्ने निर्णय पनि भएको विभागले जनाएको छ।

समितिमा सडक डिभिजन काठमाडौँ, ललितपुर, भक्तपुरसहित काठमाडौं चक्रपथ सुधार आयोजना, नेपाल विद्युत प्राधिकरण, खानेपानी लिमिटेड, काठमाडौँ उपत्यका विकास प्राधिकरण, नेपाल टेलिकम, काठमाडौँ र ललितपुर महानगरपालिका तथा ट्राफिक प्रहरीलगायतका प्रतिनिधिहरू सहभागी थिए।