हमासको कब्जाबाट विपिन मुक्त गर्न इजरायलमा नेपाली समुदायको प्रदर्शन

तेलअविव, भदौ १५ – इजरायलमा बन्धक बनाइएका व्यक्तिहरूको तत्काल रिहाइको मागसहित आइतबार आयोजित विशाल आन्दोलनमा नेपाली समुदायले पनि सक्रिय उपस्थिति जनाएका छन्।

तेलअविवको किकार खातुफिम र जेरुसलमस्थित प्रधानमन्त्री निवास अगाडि एकैपटक आयोजना गरिएको कार्यक्रममा करिब ५० हजार मानिस सहभागी थिए। सो क्रममा नेपाली समुदायका सदस्यहरूले नेपालको राष्ट्रिय झण्डा बोकेर विपिन जोशीलाई चाँडो मुक्त गर्न माग गरेका थिए।

कार्यक्रममा सहभागी नेपालीहरूले ‘विपिनलाई चाँडो रिहाई गर, परिवारसँग हामी साथमा छौं’ भन्ने नारा नेपालीमै लगाएर समर्थन जनाएका थिए।

नेपाली विद्यार्थी विपिन जोशी ६९५ दिनदेखि हमासको कब्जामा बन्धक अवस्थामा रहेका छन्। उनको रिहाइका लागि हाल अन्तर्राष्ट्रिय स्तरमै माग उठ्न थालेको छ। विभिन्न मानवअधिकार संस्था, अन्तर्राष्ट्रिय सञ्चारमाध्यम र केही राष्ट्रसंघीय निकायले समेत विपिनको रिहाइलाई मानवअधिकारसम्बन्धी गम्भीर विषयका रूपमा अघि सारेका छन्।

हाल हमासको नियन्त्रणमा रहेका ५० मध्ये दुई इजरायलीको मृत्यु भइसकेको पुष्टि भए पनि बाँकी ४८ जनाको अवस्था अझै अस्पष्ट छ। यसले गर्दा बन्धक विषयलाई विश्वव्यापी चासोको रूपमा लिइएको छ।

विश्लेषकहरूका अनुसार विपिन जोशीको रिहाइको माग केवल व्यक्तिगत मुद्दा नभई कूटनीति, अन्तर्राष्ट्रिय कानुन र मानवअधिकारको सन्देश दिने महत्त्वपूर्ण घटना हो। नेपाली समुदायले आन्दोलनमार्फत आफ्ना आवाज विश्वव्यापी समर्थन जुटाउन सक्ने संकेत गरेको देखिन्छ।