भ्रामक समाचारप्रति ओलीको आपत्ति, भण्डारीलाई सम्मानजनक भूमिकामै रहन सुझाव

काठमाडौं, भदौ १२ – प्रधानमन्त्री तथा नेकपा एमालेका अध्यक्ष केपी शर्मा ओलीको सचिवालयले काठमाडौंका विधान महाधिवेशन प्रतिनिधिसँग भएको भेटघाटसम्बन्धी समाचारप्रति आपत्ति जनाउँदै खण्डन जारी गरेको छ । सचिवालयले ओलीले नबोलेका विषयलाई हवाला दिँदै केही सञ्चारमाध्यमले भ्रामक समाचार सम्प्रेषण गरेको दाबी गरेको हो ।

बुधबार बेलुकी बालुवाटारमा काठमाडौं र ललितपुरका प्रतिनिधिहरुसँग भएको छलफल कुनै औपचारिक प्रशिक्षण नभई अनौपचारिक कुराकानी मात्र भएको सचिवालयले स्पष्ट पारेको छ ।

प्रेस विज्ञप्तिमा भनिएको छ, भेटघाटमा ओलीले वामपन्थी आन्दोलनको संघर्षपूर्ण इतिहास, व्यक्तिगत स्वार्थले आन्दोलनमा पुर्‍याएको क्षति, हाल पार्टीले लिएका नीति तथा सरकारले सुशासन र विकासका लागि गरिरहेका कामबारे आफ्ना विचार व्यक्त गरेका थिए ।

सचिवालयका अनुसार ओलीले पूर्वराष्ट्रपति विद्यादेवी भण्डारीलाई एमालेको अध्यक्ष पदमा उम्मेदवारी दिए हार्ने सम्भावना रहेको भन्दै वर्तमान भूमिकामै रहन सुझाव दिएका थिए । ओलीले भण्डारीलाई आफूले पार्टीभित्र सधैं सम्मान र माया दिएको तर अहिले उनी पार्टीविरुद्धको धारमा उभिएको देख्दा आश्चर्य लागेको उल्लेख गरेका थिए ।

ओलीको भनाइ उद्धृत गर्दै सचिवालयले जनाएको छ, “विद्यादेवी भण्डारी पार्टीमा आएर अध्यक्ष उठ्दा जित्नुहुन्न । नेतृत्वका लागि क्षमता र परिस्थिति अनुसार निर्णय लिने शक्ति चाहिन्छ । हार्ने स्थिति आएमा त्यसपछि पार्टीभित्र विवाद र कारबाहीको अवस्था निम्तिन सक्छ ।”

त्यस कारण अहिले नै सम्मानजनक भूमिकामा रहन र अनावश्यक आरोपप्रति ध्यान नदिन भण्डारीलाई ओलीले आग्रह गरेको सचिवालयले जनाएको छ । भण्डारीले च्यासल घटनालाई लिएर र नेतृत्वले देश सञ्चालन गर्न नसकेको जस्ता अभिव्यक्ति दिन थालेकोप्रति समेत ओलीले असन्तुष्टि जनाएका थिए ।

सचिवालयले भण्डारी नजिकका व्यक्तिहरूलाई पनि त्यस्ता आरोपपूर्ण गतिविधि नगर्न सम्झाउनुपर्ने उल्लेख गरेको छ ।