रुपन्देही–३ मा उपनिर्वाचन : प्रारम्भिक निर्वाचन प्रक्रियालाई रास्वपाको महत्व

काठमाडौं, भदौ १२ – राष्ट्रिय स्वतन्त्र पार्टी (रास्वपा) ले रुपन्देही–३ मा हुने उपनिर्वाचनका लागि अपनाएको उम्मेदवार छनोट प्रक्रिया लोकतान्त्रिक, पारदर्शी र जनपक्षीय भएको भन्दै यसको व्यापक स्वीकार्यता प्राप्त भएको दाबी गरेको छ ।

बुधबार बसेको पार्टी सचिवालय बैठकले प्रारम्भिक निर्वाचन कार्यविधि–२०८२ र वडा परिषद् कार्यविधि–२०८२ स्वीकृत गर्दै यसलाई संस्थागत गर्न आवश्यक तयारी अघि बढाएको जनाएको छ । पार्टीले उम्मेदवार छनोटमा सहभागी भएका नौ जना आकांक्षीहरूको इमानदारिता, उत्साह र मेहनतप्रति आभार व्यक्त गर्दै आगामी प्रक्रियामा पनि सहकार्यका लागि सबैलाई आग्रह गरेको छ ।

बैठकले प्रदेश तथा जिल्ला संगठनलाई थप सशक्त बनाउन प्रदेश इन्चार्जलाई विशेष अख्तियारी दिने निर्णयसमेत गरेको छ । साथै, तोकिएको तालिका अनुसार वडा, पालिका र जिल्ला अधिवेशन सम्पन्न गर्ने कार्ययोजना बनाउन निर्देशन दिइएको छ ।

त्यसैगरी, कृषि, स्वास्थ्य, उद्योग–व्यापार, श्रम–रोजगार र सहकारीजस्ता क्षेत्रका विज्ञलाई संलग्न गराई समस्या पहिचान, समाधानका उपाय खोज्ने र राष्ट्रिय समृद्धिमा योगदान पुर्‍याउने खालका सुझावसहित प्रतिवेदन तयार गर्ने निर्णय बैठकले गरेको छ ।

रास्वपाले प्रारम्भिक निर्वाचनलाई पार्टीभित्रको महत्वपूर्ण अभ्यासका रूपमा लिएको भन्दै सामाजिक आचारसंहिताभित्र रहँदै सबै पक्षलाई सहकार्य र सकारात्मक सहभागिताको आह्वान गरेको छ ।