प्रधानमन्त्री ओलीको पाँच दिने चीन यात्रा सुरु, भारत भ्रमण पनि तय

काठमाडौं, भदौ १४ – प्रधानमन्त्री केपी शर्मा ओली पाँच दिने औपचारिक भ्रमणका लागि शनिबार बिहान चीन प्रस्थान गरेका छन्।

त्रिभुवन अन्तर्राष्ट्रिय विमानस्थलबाट हिमालय एयरलाइन्सको उडानमार्फत ओली चीनतर्फ गएका हुन्। सो विमान भारत, बंगलादेश र म्यानमार हुँदै चीन प्रवेश गर्नेछ।

चिनियाँ राष्ट्रपति सी चिनफिङको निमन्त्रणमा भएको यस भ्रमणका क्रममा प्रधानमन्त्री ओलीले उत्तरी चीनको तिआन्जिन शहरमा आयोजना हुने सांघाई सहयोग संगठन (एससीओ) शिखर सम्मेलनमा भाग लिनेछन्। सम्मेलन १५ र १६ भदौमा हुने तय भएको छ, जसको उद्घाटन राष्ट्रपति सीले गर्नेछन्। कार्यक्रममा भारतीय प्रधानमन्त्री नरेन्द्र मोदीसहित विभिन्न मुलुकका शीर्ष नेताहरू सहभागी हुनेछन्।

प्रधानमन्त्री ओलीसँगै उनकी धर्मपत्नी राधिका शाक्य, शिक्षामन्त्री रघुजी पन्त, पर्यटनमन्त्री बद्रीप्रसाद पाण्डे, नेपाली कांग्रेस उपसभापति पूर्णबहादुर खड्का, आर्थिक सल्लाहकार डा. युवराज खतिवडा, सांसद छविलाल विश्वकर्मासहित उच्च अधिकारीहरू समेत भ्रमण टोलीमा रहेका छन्।

यस यात्रा अवधिमा प्रधानमन्त्री ओलीले राष्ट्रपति सीसहितका चिनियाँ उच्च नेतृत्वसँग भेटवार्ता गर्नेछन्। १७ भदौमा आयोजना हुने एससीओ प्लस शिखर सम्मेलनलाई समेत उनले सम्बोधन गर्ने कार्यक्रम छ। त्यस्तै, उनले चीनका उपराष्ट्रपति हान झेङलगायत अन्य नेताहरूसँग द्विपक्षीय छलफल गर्ने कार्यतालिका छ।

भ्रमणका क्रममा प्रधानमन्त्री ओली जापानी आक्रमणविरुद्ध चीनको प्रतिरोध युद्ध र विश्वव्यापी फासिवादविरोधी युद्धमा विजय प्राप्तिको ८०औं वार्षिकोत्सवमा समेत सहभागी हुनेछन्।

प्रधानमन्त्री बनेपछि ओलीको यो दोस्रो चीन भ्रमण हो। उनी भदौ १८ गते नेपाल फर्किने र त्यसपछि भदौ ३१ गते दुई दिने भारत भ्रमणमा प्रस्थान गर्ने कार्यक्रम रहेको छ।