दिशाहीन राजनीतिबाट टाढा रहने एमालेको घोषणा

काठमाडौं, फागुन ७ – केपी शर्मा ओलीले वर्तमान राजनीतिक परिस्थितिमा आफ्नो दलको मुख्य ध्यान राष्ट्रको हितमा केन्द्रित रहेको बताएका छन्। उनले देशको भूमि, स्वाधीनता, लोकतन्त्र, संविधान, राष्ट्रिय स्वाभिमान, शान्ति र सुव्यवस्था जस्ता विषयहरूलाई सर्वोपरि प्राथमिकतामा राखिएको स्पष्ट पारे।

एक कार्यक्रमलाई सम्बोधन गर्दै उनले एमाले उत्तेजना फैलाउने वा भावनात्मक स्टन्ट गर्ने प्रवृत्तिबाट टाढा रहेको दाबी गरे। उनका अनुसार पार्टी सधैं निर्माण र स्थायित्वको पक्षमा उभिएको छ, नकि अराजकता र दिशाहीन गतिविधिमा संलग्न हुने पक्षमा।

ओलीले राष्ट्रिय स्वाधीनता र सार्वभौमसत्ताको रक्षा एमालेको मूल प्रतिबद्धता भएको उल्लेख गर्दै देशमाथि कुनै पनि प्रकारको आक्रमण वा चुनौती आए चुप लागेर नबस्ने चेतावनीसमेत दिए। समाजमा भय र असुरक्षा बढेको संकेत गर्दै उनले त्यसलाई अन्त्य गरी शान्ति र सुव्यवस्था कायम गर्नु आफ्नो दलको लक्ष्य भएको बताए।

उनले स्पष्ट दिशासहित “समृद्ध नेपाल, सुखी नेपाली” को लक्ष्यतर्फ अघि बढिरहेको उल्लेख गर्दै विचारविहीन र दिशाहीन राजनीतिक प्रदर्शनमा एमाले सहभागी नहुने बताएका छन्।