प्रवासी नेपालीलाई विमानस्थलमै रातो कार्पेट बिछाउनुपर्छ : कुलमान

लिस्बन, पोर्चुगल – नेपाल विद्युत् प्राधिकरणका पूर्व कार्यकारी निर्देशक कुलमान घिसिङले प्रवासी नेपालीहरूको योगदानलाई उचित सम्मान गर्नुपर्ने बताएका छन्।

नेपाल आदिवासी जनजाति महासङ्घ पोर्चुगलले आयोजना गरेको एक कार्यक्रमलाई सम्बोधन गर्दै उनले स्वदेश फर्कने नेपालीलाई विमानस्थलमै रातो कार्पेट बिछ्याएर स्वागत गर्नुपर्ने धारणा व्यक्त गरे।

उनका अनुसार खाडी मुलुकदेखि अमेरिका, बेलायत र युरोपसम्म रहेका नेपालीले पठाउने रेमिटेन्सले मुलुकको अर्थतन्त्रलाई धानेको छ। “हाम्रो देशको आर्थिक मेरुदण्ड नै प्रवासी नेपालीको कमाइ हो, तर दुर्भाग्यवश उनीहरूलाई नेपाल फर्कँदा पर्याप्त सम्मान दिइएको देखिँदैन,” घिसिङले भने।

कार्यक्रममा उनले जनतालाई केन्द्रमा राखेर सामाजिक तथा आर्थिक रूपान्तरणको आवश्यकता औंल्याउँदै समृद्ध नेपाल निर्माणमा सबैको योगदान महत्त्वपूर्ण हुनेमा जोड दिए।

घिसिङ हाल युरोप भ्रमणमा रहेका छन् र यसअघि खाडी मुलुक, अमेरिका तथा बेलायतमा समेत उनले त्यहाँका नेपालीहरूसँग भेटघाट गरेका छन्।