गौशाला प्रहरी वृत्तमा थुनुवामाथि कुटपिटको आरोप

काठमाडौं, भदौ ८ – राजधानीको गौशाला प्रहरी वृत्तमा हिरासतमा रहेका एक थुनुवामाथि कुटपिट भएको आरोप बाहिर आएको छ।

धादिङका अनिल बिसंखे नाम गरेका व्यक्तिलाई प्रहरी जवान मदन भण्डारीले अनुसन्धानका क्रममा पिटाइ गरेको परिवारजनले बताएका छन्। कुटपिटका कारण बिसंखेको गालाको हड्डी भाँचिएको र उपचार खर्च करिब ४ लाख रुपैयाँ लाग्ने अस्पतालले जनाएको पीडित पक्षको दाबी छ।

बिसंखे एक पूर्वसैनिक अधिकृतको घरमा ल्यापटपसहितका सामग्री चोरी गरेको अभियोगमा पक्राउ परेका थिए। घटनामा संलग्न भनिएका प्रहरी जवान भण्डारी लामो समयदेखि गौशाला प्रहरी वृत्तमै कार्यरत छन्।

यस विषयमा सोध्दा प्रहरी वृत्त गौशालाका डिएसपी सुकदेव खनालले भने आरोप अस्वीकार गर्दै थुनुवालाई नियमित स्वास्थ्य परीक्षण गरेरै राख्ने गरिएको बताए।

मानवअधिकारकर्मीहरूले भने हिरासतमा राखिएका व्यक्तिमाथि यातना दिनु प्रहरी आचारसंहिताविपरीत भएको भन्दै यस्ता घटनाले प्रहरीप्रतिको विश्वास गुम्ने चेतावनी दिएका छन्।