आमासँग अन्तिम फोनपछि गायब, अर्को दिन सुटकेसभित्र भेटिइन् रुबी

रौतहट, भदौ ९ – रौतहटमा सुटकेसभित्र महिलाको शव फेला परेको घटनाले स्थानीयलाई मात्र होइन, प्रहरीले समेत चकित बनाएको छ ।

मृतक २६ वर्षीया रुबीकुमारी साह शनिबार बेलुका गौर बजार जाने भन्दै डेराबाट निस्किएकी थिइन् । त्यसअघि उनले आमा मिथिला देवी साहलाई फोन गरेर बजारबाट के ल्याउने भनेर सोधेकी थिइन् । आमा–छोरीबीचको त्यो फोन संवाद नै अन्तिम बनेको छ ।

आइतबार बिहान गौर नगरपालिका–९ मुडवालगेट नजिकै सडक किनारमा ठूलो निलो सुटकेस भेटियो । बाहिरैबाट डोरीले बाँधिएको देखिएपछि प्रहरीलाई विस्फोटक वा शंकास्पद वस्तु हुनसक्ने लागेको थियो । तर बिहान खोजतलास गर्दा सुटकेसभित्र पट्याएर राखिएको महिलाको शव भेटियो ।

‘शवलाई पुरै खुम्च्याएर सुटकेसभित्र कोचिएको थियो, यस्तो दृश्य पहिलो पटक देखेँ,’ जिल्ला प्रहरी कार्यालय रौतहटका डीएसपी राजु कार्कीले भने । शवको नाकमा मात्र हल्का रगत देखिएको र अन्यत्र कुनै चोटपटक नभएको प्रहरीले जनाएको छ ।

शवको सनाखत पछि ती महिला रुबी साह भएको पुष्टि भयो । भारतको मुजफ्फरपुर निवासी शिवसागर साहसँग पाँच वर्षअघि विवाह गरेकी रुबी पछिल्लो समय रौतहटमा आमासँगै ४ वर्षीय छोरालाई पढाउन डेरामा बस्दै आएकी थिइन् । घटनास्थल र उनको डेराबीच करिब पाँच किलोमिटर दूरी रहेको प्रहरीले जनाएको छ ।

घटनास्थल नेपाल–भारत सीमा नजिकै पर्नुले हत्या भारतमा गरेर नेपालमा शव ल्याई फालिएको हुनसक्ने आशंका प्रहरीले गरेको छ । ‘सीमा नजिक भएकाले अनुसन्धान अझै जटिल हुन्छ,’ अनुसन्धानमा संलग्न एक अधिकृतले भने ।

रुबीको शव भेटिए पनि उनको मोबाइल भने भेटिएको छैन । हत्यापछि मोबाइल लैजाने वा नष्ट गर्ने गरिएको हुनसक्ने प्रहरीको अनुमान छ । लोकेशन अनुसार मोबाइल गौर क्षेत्रमा अन्तिम पटक सक्रिय रहेको देखिएको छ ।

प्रहरीले वरपरका सीसीटीभी फुटेज संकलन गरी अनुसन्धानलाई अघि बढाइरहेको छ । साथै सुटकेस कसको घर वा कोठाबाट आएको भन्नेबारेमा पनि गहिरो अध्ययन भइरहेको छ । मधेश प्रदेश प्रहरी कार्यालयका डीआईजी उमाप्रसाद चर्तुवेदीका अनुसार, ‘सुटकेसभित्र शव भेटिएको संवेदनशील घटनालाई उच्च प्राथमिकतामा राखेर सीमा क्षेत्रदेखि सबै कोणबाट अनुसन्धान भइरहेको छ ।’