पशुपतिमा शवको हड्डी बिक्री प्रकरण: चार जनाविरुद्ध मुद्दा दर्ता

काठमाडौं, भदौ १२ – पशुपति आर्यघाटमा जलिरहेको शवको हड्डी निकालेर बेच्ने प्रयास गरेको आरोपमा चार जनाविरुद्ध मुद्दा दर्ता भएको छ।

मुद्दा दर्ता हुनेहरूमा सर्लाहीको लालबन्दी–२ का ४२ वर्षीय रामनन्दन ठाकुर, काभ्रेको मण्डनदेउपुरका ६१ वर्षीय गणेशप्रसाद (जीवनाथ) ढकाल, उदयपुरको कटारी–८ का २४ वर्षीय विनायक मैनाली र सप्तरीको वलानबिहुल–६ का ४१ वर्षीय मिश्रीलाल यादव रहेका छन्।

प्रहरीको अनुसन्धान अनुसार, मृतक राम शाहीको २३ साउनमा पशुपतिमा सद्गद गर्न जाँदा जिवनाथ ढकाल र विनायक मैनाली शवको हड्डी निकालेर त्यसलाई कपुरको बट्टामा राखेर रामनन्दन र मिश्रीलाललाई दिएका थिए। यसरी उनीहरूले हड्डी बेच्ने काम गरेको पुष्टि भएको छ।

काठमाडौं जिल्ला अदालतमा धर्मसम्बन्धी कसुरमा मुद्दा दायर गरिएको छ। न्यायाधीश ईश्वरीप्रसाद भण्डारीको इजलासमा चारैजनाको बयान भइरहेको छ। बयान सकिएपछि थुनछेकको बहस हुनेछ र त्यसपश्चात पुर्पक्षका लागि कारागार पठाउने वा धरौटीमा छोड्ने निर्णय हुनेछ।

मुलुकी फौजदारी संहिताअन्तर्गत दफा १५७ (१) अनुसार धार्मिक रीतिमा बाधा पुर्‍याउने दोषी ठहरिएमा एक वर्षसम्म कैद वा १० हजार रुपैयाँसम्म जरिवाना वा दुबै सजाय हुने प्रावधान छ। मिश्रीलाललाई सह–दोषीको रुपमा मुद्दा दर्ता गरिएको छ र मुख्य दोषीको आधा सजाय पाउने व्यवस्था गरिएको छ।