सुरेन्द्र पाण्डे : नेपालको विकासका लागि एमसीसी र बीआरआई दुवै अपरिहार्य

काठमाडौं, भदौ ८ – नेकपा (एमाले)का उपाध्यक्ष सुरेन्द्र पाण्डेले नेपालको विकासका लागि मिलेनियम च्यालेन्ज कर्पोरेसन (एमसीसी) र चिनियाँ ‘बेल्ट एण्ड रोड इनिसिएटिभ’ (बीआरआई) दुवै परियोजना आवश्यक भएको बताएका छन्।

आइतबार काठमाडौंमा आयोजित एक अन्तरक्रियामा बोल्दै पाण्डेले एमसीसीबारे भइरहेका विरोध प्रदर्शनलाई ‘भावनात्मक र तथ्यविहीन’ भन्दै आलोचना गरे। उनका अनुसार एमसीसी कार्यान्वयन भए अमेरिकाले नेपालमा सैनिक अड्डा स्थापन गर्छ भन्ने आशंका पूर्णतः निराधार हो।

“एमसीसी लागू हुँदा नेपालमा अमेरिकी सैनिक अड्डा आउँछ भन्ने कुरा हल्ला मात्र हो। यदि त्यस्तो हुने भए त नेपाल अहिलेसम्म कोलोनाइज भइसक्ने थियो,” उनले स्पष्ट पारे।

उनले नेपालले सहयोग लिनेदेखि अस्वीकार गर्नेसम्मका निर्णयमा राष्ट्रहितलाई प्राथमिकता दिनुपर्नेमा जोड दिए। “हामीलाई सबै किसिमका सहयोग चाहिन्छ। एउटा लिने, अर्को नलिने भन्ने स्थिति छैन। बीआरआई पनि चाहिन्छ, एमसीसी पनि चाहिन्छ। सबै स्रोत जुटाएर मात्रै नेपाल अघि बढ्छ,” पाण्डेले भने।

पाण्डेका अनुसार छिमेकी मुलुकहरूबारे अस्वच्छ विश्लेषणले नेपाललाई मात्र घाटा पुर्‍याएको छ। उनले अमेरिकाले चीनलाई घेराबन्दी गर्न नेपाल प्रयोग गर्छ भन्ने तर्कलाई पनि खारेज गर्दै, “चीनलाई जोगाउन हामीले केही गर्न सक्दैनौं। चीन आफैं बलियो भएर जोगिन्छ,” टिप्पणी गरे।

उनले राजनीतिक बहसमा तथ्यभन्दा बढी भ्रम सिर्जना भइरहेको भन्दै यथार्थपरक दृष्टिकोणले मात्र नेपाललाई विकासको बाटोमा लैजान सकिने बताए।