रवि लामिछानेकी पत्नी निकिताको माग : ‘बैंक जमानतमा जेलबाहिरै मुद्दा लड्न दिनुपर्छ’

काठमाडौं, भदौ ९ – राष्ट्रिय स्वतन्त्र पार्टी (रास्वपा)का सभापति रवि लामिछानेकी पत्नी निकिता पौडेल लामिछानेले श्रीमानलाई बिगो रकम तोकेर बैंक जमानतमार्फत जेलबाहिरैबाट मुद्दा लड्न दिने व्यवस्था गर्न आग्रह गरेकी छिन्।

सोमबार उच्च अदालत तुलसीपुरको बुटवल इजलासमा रिट निवेदन दर्ता गरेपछि निकिताले यस्तो माग सार्वजनिक गरेकी हुन्। उनले न्याय पाउन संविधान र कानुनले अनुमति दिएका सबै विकल्प प्रयोग गर्ने दृढता व्यक्त गरिन्।

‘मेरो श्रीमान भन्छन्, शक्ति पृथकीकरण समाप्त भएको धेरै भयो, एउटै रावणका फरक टाउका गन्न छाड,’ निकिताले भनिन्, ‘तर श्रीमतीका हैसियतले मेरो पनि दुराग्रह छ। न्याय पाइयोस् कि नपाइयोस्, म कानुनले दिएको अधिकार अनुसार भित्र र बाहिर सबै न्यायका ढोकामा ढकढक्याउने छु।’

निकिताले लामिछानेको जीवन जेलभित्र असुरक्षित रहेको दाबी समेत गरिन्। उनले भैरहवा कारागारमा लामिछानेलाई राखिएको अवस्था नियतसहितको रहेको आरोप लगाइन्।

‘हिजो पनि भनेकी थिएँ, आज पनि भन्छु— मेरो श्रीमानको जीवन जेलमा सुरक्षित छैन,’ उनले भनिन्, ‘किन उहाँलाई जेल नसराउने भन्ने प्रश्नको जवाफ दिन अब आवश्यक छैन।’

अन्त्यमा निकिताले भनिन्, ‘बिगो रकम निर्धारण गरियोस् र त्यस बराबरको बैंक जमानत लिई जेलबाहिरै मुद्दा लड्न दिनुपर्छ। यही मेरो माग हो।’

जिल्ला अदालत बुटवलको पछिल्लो आदेशविरुद्ध उच्च अदालतमा दर्ता भएको रिट निवेदनमाथि सुनुवाइ अगाडि बढ्ने भएको छ।