अमेरिकामा मानिसको शरीरभित्र मासु खाने किरा फेला, कसरी पुग्छ शरीरमा ?

वासिङ्टन डीसी, भदौ १२ – अमेरिकामा पहिलोपटक एक व्यक्तिको शरीरभित्र न्यू वर्ल्ड स्क्रूवर्म नामक मासु खाने किरा भेटिएको छ। एल साल्भाडोरबाट फर्किएका ती बिरामीमा परजीवीको संक्रमण पत्ता लागेको अमेरिकी स्वास्थ्य तथा मानव सेवा मन्त्रालयले जनाएको छ।

अगस्ट ४ मा अमेरिकी रोग नियन्त्रण तथा रोकथाम केन्द्र (CDC) ले संक्रमण पुष्टि गरेको थियो। हाल बिरामी उपचारपछि पूर्ण रूपमा निको भइसकेको र अरूमा संक्रमण फैलिएको कुनै प्रमाण नभएको बताइएको छ।

अमेरिकी कृषि मन्त्रालयको पशु तथा वनस्पति स्वास्थ्य निरीक्षण सेवाका अनुसार, स्क्रूवर्म सामान्यतया झिँगा जस्तै देखिने खतरनाक परजीवी हो। यसले घरपालुवा जनावर, जङ्गली जनावर र पशुधनमा आक्रमण गर्छ। दुर्लभ अवस्थामा मात्र मानिसमा संक्रमण देखिन्छ।

यो झिँगा हरियो वा नीलो रङ्गको हुन्छ र पछाडि तीन कालो धार हुन्छन्। पोथी स्क्रूवर्मले प्रायः घाउमा अण्डा पार्छन्। अण्डाबाट निस्किएका सयौँ लार्भा सीधै जीवित मासुमा छिरेर गम्भीर क्षति पुर्‍याउँछन्। समयमै उपचार नगरिए मृत्यु पनि हुनसक्छ।

विशेषगरी खुला घाउ भएका मानिसलाई यो किराबाट उच्च जोखिम हुन्छ। उपचार भनेको लार्भा हटाएर घाउ सफा गर्नु नै हो। सुरुवाती अवस्थामा पहिचान भएमा संक्रमण फैलिन रोक्न सकिन्छ।

अमेरिकामा यसअघि पनि स्क्रूवर्मले गाईवस्तु उद्योगलाई ठूलो नोक्सान पुर्‍याएको इतिहास छ। १९३० को दशकमा दक्षिणपूर्वी क्षेत्रका विभिन्न राज्यहरूमा यसले व्यापक असर पारेको थियो। पछि अनुसन्धानकर्ताले नसबन्धी गरिएको भाले स्क्रूवर्म प्रयोग गरी यसको उन्मूलन गरेका थिए।

तर, पछिल्लो वर्ष पनामामा पुनः संक्रमण देखिएको थियो। यसै जुलाईमा मेक्सिकोमा नयाँ बिरामी भेटिएपछि अमेरिकी सरकारले गाईवस्तु आयातमा नियन्त्रण लगाएको छ।

अमेरिका हरेक वर्ष मेक्सिकोबाट १० लाखभन्दा बढी गाईवस्तु आयात गर्छ। यदि स्क्रूवर्म फैलियो भने यसले गाईवस्तु उद्योगसँग सम्बन्धित सय अर्ब डलरभन्दा बढीको आर्थिक गतिविधिलाई असर पार्न सक्ने विशेषज्ञहरूको चेतावनी छ। यद्यपि, हालको अवस्थामा जनस्वास्थ्यमा तत्कालीन जोखिम न्यून भएको बताइएको छ।