प्रहरी प्रमुख पाण्डेको भनाइलाई सांसद यादवद्वारा निन्दा

काठमाडौं, भदौ १३ – नेपाली कांग्रेसकी सांसद नागिना यादवले आन्दोलनरत कवाड व्यवसायीको माग तत्काल सम्बोधन गर्न सरकारलाई आग्रह गरेकी छन्।

शुक्रबार प्रतिनिधिसभाको बैठकमा बोल्दै उनले सोमबारदेखि निरन्तर सडकमा रहेका व्यवसायीहरूसँग सरकार संवादमा नउत्रिएकोमा गम्भीर आपत्ति जनाइन्। उनले वार्तामार्फत समस्या समाधान नगरी सरकारले उपेक्षा गरेको भन्दै असन्तोष प्रकट गरिन्।

त्यसैगरी, सांसद यादवले काठमाडौं महानगरपालिका प्रहरी प्रमुख एसएसपी राजु पाण्डेद्वारा दिएको भनाइप्रति पनि गहिरो असन्तोष व्यक्त गरिन्। पाण्डेले ‘गोरा मात्र नेपाली हुन्, काला नेपाली होइनन्’ भन्ने अभिव्यक्ति दिएको विषयलाई उनले रंगभेदी, आपत्तिजनक र निन्दनीय भन्दै तत्काल माफी माग्नुपर्ने माग गरिन्।

उनले भनिन्, “रंगले होइन, जन्म र परिचयले नेपाली हुने हो। त्यसकारण यस्तो भेदभावपूर्ण अभिव्यक्ति अस्वीकार्य छ। सरकारलाई आग्रह छ, आन्दोलनरत व्यवसायीको माग सम्बोधन होस् र प्रहरी प्रमुखले सार्वजनिकरूपमा माफी मागून्।”

सांसद यादवले सभामुखमार्फत सरकारलाई यस विषयमा तुरुन्त पहल गर्न अनुरोध गरेकी छिन्।