प्रधानमन्त्री कार्कीको घोषणा : नेपाली नोटमा नेपाल संवत् समावेश गर्ने तयारी सुरु

काठमाडौं, असोज ५ – नेपाल सरकारले अब नेपाली मुद्रामा नेपाल संवत् उल्लेख गर्ने प्रक्रिया अघि बढाउने तयारी गरेको छ। प्रधानमन्त्री सुशीला कार्कीले यसबारे औपचारिक प्रतिबद्धता व्यक्त गर्दै आवश्यक परामर्श प्रक्रिया सुरु गरिने बताएकी छन्।

नेपाल संवत् ११४६ को अवसरमा भक्तपुरको मध्यपुर थिमीमा आयोजित विशेष कार्यक्रममा प्रधानमन्त्री कार्कीले सम्बोधन गर्दै भनिन्, “नेपाल राष्ट्र बैंकद्वारा जारी गरिने नोटमा नेपाल संवत् उल्लेख गर्ने विषयमा सम्बन्धित निकायसँग छलफल गरी प्रक्रिया अघि बढाइनेछ।”

उनले नेपाल संवत् नेपालको मौलिक पहिचान र ऐतिहासिक गौरव भएको उल्लेख गर्दै यसलाई व्यवहारिक रूपमा सरकारी निकायमा पनि लागू गर्नुपर्ने आवश्यकता औंल्याइन्।

प्रधानमन्त्री कार्कीका अनुसार, नेपाल संवत् मात्र पात्रोको हिसाब होइन, यो देशको सांस्कृतिक, आर्थिक र मानवीय एकताको प्रतीक हो। उनले थपिन्, “शंखधर सा:ख्वाको योगदानले ऋणमुक्त समाज निर्माण गरेको ऐतिहासिक उदाहरण हामी सबैका लागि प्रेरणादायी छ।”

शंखधर सा:ख्वाले राजा राघवदेवको शासनकालमा ऋणमा डुबेका नागरिकहरूलाई मुक्त गराएर नेपाल संवत् प्रारम्भ गरेको विश्वास गरिन्छ। उनी वि.सं. २०५६ मा राष्ट्रिय विभूति घोषित भएका थिए, भने वि.सं. २०६५ कात्तिक ७ गते नेपाल संवत्‌लाई राष्ट्रिय संवत् घोषणा गरिएको थियो।

प्रधानमन्त्री कार्कीले नेपाल संवत् कार्यान्वयनलाई प्रभावकारी बनाउन मन्त्रालयहरूलाई निर्देशन दिने र अनुगमनका लागि सम्बन्धित प्रतिष्ठानहरूसँग सहकार्य गर्ने तयारीसमेत रहेको बताइन्।

उनले जोड दिइन्, “नेपाल संवत् हाम्रो गौरव हो, यसलाई व्यवहारिक रूपमा अंगिकार गरेर सामाजिक एकता र राष्ट्रिय पहिचानलाई अझ सबल बनाउनुपर्छ।”