संविधान छेडखानी भए सडक–सदन दुवैबाट प्रतिवाद : प्रचण्डको चेतावनी

काठमाडौं, चैत २८ – नेकपा (माओवादी केन्द्र) का संयोजक पुष्पकमल दाहाल ‘प्रचण्ड’ले संविधानमाथि हस्तक्षेप भए सडक र सदन दुवैबाट कडा प्रतिवाद गर्ने चेतावनी दिएका छन्। उनले जनताले संघर्षबाट प्राप्त गरेका अधिकार कमजोर पार्ने कुनै पनि प्रयास स्वीकार्य नहुने स्पष्ट पारे।

शनिबार पेरिसडाँडास्थित पार्टी कार्यालयमा आयोजित कार्यक्रममा बोल्दै प्रचण्डले वर्तमान सरकारको सकारात्मक कामलाई समर्थन गर्ने तर संविधानविपरीत कदम चालिए प्रतिरोध गर्ने बताए। उनले राष्ट्रिय हितमा आँच पुग्ने वा नागरिक अधिकार घटाउने गतिविधि भए त्यसको विरोध अपरिहार्य हुने उल्लेख गरे।

प्रचण्डले विद्यार्थी र कर्मचारी ट्रेड युनियनका अधिकारमाथि प्रश्न उठाउने प्रयास भइरहेको भन्दै त्यसप्रति सचेत रहन आग्रह गरे। उनले जनअधिकारमाथि कुनै प्रकारको छेडखानी हुन नदिन सबै पक्ष सजग हुनुपर्ने धारणा राखे।

यद्यपि उनले संविधान संशोधनको विरोधी नभएको स्पष्ट गर्दै संशोधन जनताको अधिकार थप्ने दिशामा हुनुपर्ने बताए। विशेषगरी महिला अधिकार विस्तार र जनताको सशक्तिकरणका लागि संशोधन आवश्यक रहेको उनको भनाइ छ।