रास्वपाले रुपन्देही–३ उपनिर्वाचनका लागि उम्मेदवार छनोट प्रक्रिया अघि बढायो

काठमाडौँ, असार २६ – राष्ट्रिय स्वतन्त्र पार्टी (रास्वपा) ले आउँदो कात्तिक १७ गते हुने रुपन्देही–३ प्रतिनिधिसभा सदस्यको उपनिर्वाचनका लागि उम्मेदवार छनोट प्रक्रिया औपचारिक रूपमा अघि बढाएको छ।

बुधबार पार्टीको केन्द्रीय कार्यालय, वनस्थलीमा बसेको सचिवालय बैठकले उम्मेदवार छनोट सम्बन्धी कार्यविधि पारित गरेको हो। महासचिव कवीन्द्र बुर्लाकोटीका अनुसार उक्त कार्यविधिलाई केन्द्रीय समिति सदस्यहरूबाट राय संकलन गर्न पठाइएको छ।

पार्टीले केही दिनभित्र इच्छुक उम्मेदवारहरूबाट आवेदन माग गर्ने तयारी गरेको छ। प्राप्त निवेदनहरूको मूल्याङ्कन गरी तय मापदण्डअनुसार उम्मेदवारको छनोट गरिनेछ।

उपनिर्वाचनका लागि आवश्यक सम्पूर्ण तयारी र समन्वयको जिम्मेवारी रास्वपाका सहमहामन्त्री तथा लुम्बिनी प्रदेश इन्चार्ज विपिनकुमार आचार्यलाई दिइएको छ।

“पार्टीले लोकतान्त्रिक अभ्यासलाई ध्यानमा राख्दै स्पष्ट प्रक्रिया अनुसार उम्मेदवार चयन गर्ने निर्णय गरेको छ,” महामन्त्री बुर्लाकोटीले भने, “अब छिट्टै आवेदन आह्वान हुनेछ र निष्पक्ष मूल्याङ्कनका आधारमा योग्य उम्मेदवार अघि सारिनेछ।”

उपनिर्वाचन नजिकिँदै जाँदा रास्वपाले संगठनात्मक रूपमा तयारी तीव्र पारेको देखिएको छ। पार्टीले लुम्बिनी प्रदेशमा आफ्नो प्रभाव विस्तार गर्ने अवसरको रूपमा यो निर्वाचनलाई लिएको छ।