बाबुराम भट्टराईको आरोप : “ओली–प्रचण्ड स्टालिन शैलीमा आलोचकको सफाया गर्दैछन्”

काठमाडौं, साउन १६ – नेपाल समाजवादी पार्टी (नयाँ शक्ति) का अध्यक्ष डा. बाबुराम भट्टराईले नेकपा एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’लाई लक्षित गर्दै ती दुबै नेता स्टालिनको शैलीमा आलोचकलाई हटाउने प्रवृत्तिमा लागेको आरोप लगाएका छन्।

सामाजिक सञ्जालमा स्टालिनकालीन रूसको ‘ग्रेट ट्रायल’ (सन् १९२७–३८) सन्दर्भ जोड्दै भट्टराईले लेखेका छन्, “आज पनि मूल नेतृत्वसँग मत फरक राख्नेहरूलाई आरोप लगाएर राजनीतिक र सांगठनिक रूपमा समाप्त पार्ने चलन बढेको छ।”

उनले एमाले र माओवादीभित्रको गहिरिँदो अन्तरसंघर्ष, वैचारिक स्खलन र निषेधको संस्कृतिबारे चिन्ता व्यक्त गरे। रूसी कम्युनिष्ट पार्टी झैं नेपालको कम्युनिष्ट आन्दोलन पनि विलयको दिशामा गएको उनको टिप्पणी थियो।

“रूसमा स्टालिनले त्रोत्स्की, जेनोभिभ, कामेनेभजस्ता नेताहरूलाई भौतिकरूपमै हटाए; नेपालमा पनि त्यस्तै शैलीमा आलोचकहरूलाई राजनीतिक रूपमा निष्कासन गरिँदैछ,” उनले भने।

पूर्वप्रधानमन्त्रीसमेत रहेका भट्टराईले सत्तामा पटक–पटक पुगे पनि कम्युनिष्ट पार्टीहरूले जनपक्षीय रूपान्तरण गर्न नसकेको र ‘समाजवादको नारा’ मात्र बाँकी रहेको टिप्पणी गरे।

उनको निष्कर्ष थियो – इतिहासबाट नसिक्ने नेताहरूका कारण कम्युनिष्ट आन्दोलन सुन्निएर मोटाएको अवस्थामा पुगेको छ।