माओवादीलाई विश्वास नगरे देश संकटमा पर्छ : अध्यक्ष प्रचण्ड

काठमाडौँ, भदौ ११ – नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले माओवादीलाई जनताले विश्वास नगरे देश गम्भीर संकटमा पर्न सक्ने चेतावनी दिएका छन्।

बुधबार राजधानीमा आयोजित पोष्टबहादुर बोगटी स्मृति राष्ट्रिय ऊर्जा संवाद कार्यक्रममा सम्बोधन गर्दै उनले माओवादीको सरकार आएपछि राम्रा काम मात्र भएको दाबी गर्दै भने, “यदि माओवादीलाई विश्वास नगर्ने हो भने यो देश बाँच्दैन, दुर्घटनामा पर्छ भन्ने मलाई लाग्छ।”

प्रचण्डले नेपाली काँग्रेस र नेकपा एमालेलाई निरन्तर भ्रष्टाचारमा संलग्न भएको आरोप लगाउँदै अहिलेको सरकार पनि त्यही ढाकछोपको आधारमा बनेको बताए। उनका अनुसार, काँग्रेस–एमालेले आफूलाई र आफ्ना नेताहरूलाई जोगाउन मात्र गठबन्धन सरकार बनाएका हुन्।

“माओवादीको पहिलोदेखि तेस्रो सरकारसम्ममा जनतामुखी कार्यक्रम मात्रै भए। तर अहिले बनेको यो सरकार डर र भ्रष्टाचार ढाकछोपकै परिणाम हो,” प्रचण्डको भनाइ थियो।

उनले हालको सत्ता व्यवस्थाबाट सुशासन र समृद्धिको आशा गर्नु निरर्थक हुने टिप्पणी गर्दै भने, “सदनमै मैले भनेको छु—यो सरकार भ्रष्टाचारको आवरण हो, यसले जनताको अपेक्षा पूरा गर्न सक्दैन।”

प्रचण्डले अन्त्यमा जनतालाई माओवादीलाई भरोसा गर्न आग्रह गर्दै भने, “देशलाई सही बाटोमा लैजाने शक्ति माओवादीकै हो, त्यसैले माओवादीमाथि विश्वास जरुरी छ।”