महाधिवेशन समयमै नहुँदा नेतृत्व छाड्न नपाएको देउवाको दाबी

काठमाडौं, मंसिर १३ – नेपाली कांग्रेसका सभापति शेरबहादुर देउवाले पार्टीमा समयमै महाधिवेशन नहुनु आफैंलाई नेतृत्व हस्तान्तरण गर्न नदिएको मुख्य कारण भएको बताएका छन्।

शनिबार देउवा निवासमा भएको अनौपचारिक छलफलमा सहभागी एक पदाधिकारीका अनुसार सभापति देउवाले “मैले नियमित महाधिवेशन मंसिरमै गर्ने भनेको थिएँ, तर त्यो हुन सकेन,” भन्ने दुखेसो पोखेका थिए।

देउवाले असोज २८ गते नै उपसभापति पूर्णबहादुर खड्कालाई कार्यवाहक तोकिएको कारण पनि समयमै महाधिवेशन गर्न सहयोग पुग्ने अपेक्षा रहेको बताए। तर पार्टी नेतृत्वले प्रक्रिया ढिलाइ गरेपछि अब कार्यसमितिको म्याद थप्नुपर्ने बाध्यता आएको उनको तर्क थियो।

“म धेरै म्याद थप्न चाहन्नँ। मैले सभापति पद महाधिवेशनबाट छोड्ने भनेको हो। तर किन तपाईंहरूले सन्तोषले छोड्न दिइरहनुभएको छैन?” देउवाको भनाइ उद्धृत गर्दै पदाधिकारीले जानकारी दिए।

छलफलमा देउवाले नियमित महाधिवेशन होस् वा विशेष महाधिवेशन – दुवै अवस्थामा आफू नेतृत्व हस्तान्तरण गर्न तयार रहेको स्पष्ट पारे। उनका अनुसार, नयाँ नेतृत्व खोज्नेहरू नै महाधिवेशन गर्न इच्छुक नदेखिनु आश्चर्यजनक भएको बताएका थिए।

गत तीन दिनदेखि देउवा र कार्यवाहक सभापति खड्का विभिन्न नेताहरूसँग अनौपचारिक संवाद गर्दै आएका छन्। यही सिलसिलामा सभापति–कार्यवाहक सभापतिको प्रस्तावअनुसार पुसको अन्तिम साताभित्र नियमित महाधिवेशन गर्ने विषयमा प्रारम्भिक सहमति बनेको बुझिएको छ।

तर, पूर्वउपसभापति विमलेन्द्र निधि र पूर्वमहामन्त्री कृष्णप्रसाद सिटौलाले उक्त प्रस्तावलाई सभापतिकै उपस्थितिमा अस्वीकार गरेका थिए। उनीहरूका अनुसार फागुन २१ को चुनावअघि महाधिवेशन गर्ने पक्षमा बहुमत छैन।

देउवाले भने ढिलोमा पुस मसान्तभित्र महाधिवेशन हुनैपर्ने जिकिर गर्दै आएको पदाधिकारीले बताएका छन्। तर नेताहरूबीच मतभेद कायम रहेकाले मंसिर १५ का लागि तय गरिएको केन्द्रीय समिति बैठक परिणाम निकाल्ने अपेक्षासहित सारिएको छ।

सभापतिले पार्टीले आम चुनावमा जाने निर्णय गरिसकेको स्मरण गराउँदै, “निर्वाचनअघि महाधिवेशन सम्पन्न गरी एकताबद्ध भएर अघि बढ्नुपर्छ,” भन्दै क्रियाशील सदस्यता लगायत संवेदनशील प्रक्रियाहरूलाई फास्ट ट्र्याकबाट टुंग्याउन आग्रह गरेका छन्।