रुबी साह हत्या प्रकरण : आरोपी लक्ष्मण पासवानले आत्मस्वीकृति भिडियो पोष्ट गर्दै शरीरमा आगो लगाए

जनकपुरधाम, भदौ ११ – रौतहटकी २६ वर्षीया रुबी साहको हत्या प्रकरणमा संलग्न मुख्य आरोपी लक्ष्मण पासवानले आत्मस्वीकृति जनाउँदै भिडियो फेसबुकमा अपलोड गरेका छन् । उक्त भिडियोमा उनले रुबीको हत्या आफूले नै गरेको स्वीकार गर्दै पश्चात्ताप व्यक्त गरेका छन् ।

पासवानले भिडियोमा भनेका छन्, “रुबीलाई मारेदेखि मेरो हात काँपिरहेको छ । उनी बिना बाँचेर के गर्नु भन्ने लागेको छ । पक्राउ परे लामो सजाय भोग्नुपर्छ भन्ने पीडा भएको छ ।”

उनले रुबीसँगको पुरानो प्रेमसम्बन्धदेखि पारिवारिक दबाब र आर्थिक कठिनाइका कारण तनाव बढेको खुलाएका छन् । हत्या अघि रुबी ब्युटी पार्लरबाट उनको कोठामा आएको र ‘एक अर्काबिना बाँच्न नसक्ने’ कुराकानीसमेत भएको उनले भिडियोमा बताए ।

गत शनिबार राति गौर–सिरसिया सडकखण्ड अन्तर्गत गौर नगरपालिका–९ मा सुटकेसभित्र रुबीको शव फेला परेको थियो । चार वर्षीया छोरासहित गौरमा डेरा गरी बस्दै आएकी रुबी भारतको मुजफ्फरपुर घरकी थिइन् ।

प्रहरी अनुसन्धानअनुसार रुबीको गौरकै एक घरमा हत्या गरी शवलाई रिक्सामा राखेर सडकछेउ फालिएको देखिएको छ ।

बुधबार बिहान माधव नारायण नगरपालिका–६ स्थित नहर किनारमा पासवान आफ्नै शरीरमा आगो लगाएर गम्भीर घाइते अवस्थामा भेटिएका थिए । जिल्ला प्रहरी कार्यालय रौतहटका एसपी नेत्रमणी गिरीका अनुसार उनलाई नियन्त्रणमा लिएर उपचारका लागि अस्पताल पठाइएको छ ।