चितवनमा कुकुरलाई लाठी–फरुवाले प्रहार गर्दै हत्या, दोषीमाथि कारबाहीको माग

काठमाडौं, भदौ १३ – चितवनको पदमपुरस्थित कालिका क्षेत्रमा दुई पुरुषले कुकुरलाई निर्ममतापूर्वक हत्या गरेका छन् । मासु देखाएर नजिक ल्याइएका कुकुरलाई लाठी र फरुवाले लगातार प्रहार गरी तड्पाउँदै मारेको दृश्यसमेत सामाजिक सञ्जालमा भाइरल भएको छ।

यस घटनाप्रति सर्वसाधारण र पशु अधिकारकर्मीहरूले आक्रोश व्यक्त गर्दै दोषीलाई कडा कारबाही गर्न माग गरेका छन् । प्रत्यक्षदर्शीका अनुसार, ती पुरुषहरूले ‘कुकुरले टोक्न आयो’ भनेर बहाना बनाइ हत्या गरेका थिए।

पशु अधिकारकर्मी इरफान खानले यस्तो क्रूर काम गैरकानुनी भएको भन्दै दोषीलाई तुरुन्त पक्राउ गर्न माग गरे । उनले भने, ‘मासु खान आएको कुकुर कसरी आक्रमण गर्छ ? यस्तो घटना हेर्दै दुखद छ।’

घटनाबारे प्रहरीले जानकारी पाएको र अनुसन्धानका लागि टोली पठाउने तयारी भइरहेको जनाएको छ।