वीरगन्जमा गृहमन्त्री लेखकले लिए हैजा बिरामीको स्वास्थ्यबारे जानकारी

पर्सा, भदौ १५ – हैजा संक्रमण फैलिएपछि गृहमन्त्री रमेश लेखक शनिबार साँझ वीरगन्ज पुगेका छन्। उनले नारायणी अस्पताल, तराई अस्पताल र वीरगन्ज हेल्थ केयर अस्पतालमा उपचाररत बिरामीहरूको स्वास्थ्य अवस्थाबारे प्रत्यक्ष जानकारी लिएका छन्।

गृहमन्त्री लेखकले महामारी नियन्त्रणका लागि नेपाली सेना, नेपाल प्रहरी र सशस्त्र प्रहरी बलका स्वास्थ्यकर्मी खटाइने बताएका छन्। आवश्यक परे थप जनशक्ति, औषधि र उपकरण तत्काल पठाउने व्यवस्था मिलाइसकिएको उनको भनाइ छ।

“हामी नागरिकको जीवन रक्षामा कुनै कमी हुन दिँदैनौँ,” गृहमन्त्री लेखकले अस्पताल प्रशासनसँगको भेटमा भने।

उनका अनुसार महामारी दीर्घकालीन रूपमा नियन्त्रणमा ल्याउन मूल कारण पहिचान गर्न विशेषज्ञहरूसँग सल्लाह लिइनेछ। यसै क्रममा नेपाल प्रहरी र सशस्त्र प्रहरीका दुई जना चिकित्सकलाई प्रभावित क्षेत्रमा निगरानी र समन्वयको जिम्मेवारी दिइएको छ।