उपमेयर डंगोलको आग्रह : “संविधान उल्लंघन नगरी मिलेर बजेट ल्याऔं”

काठमाडौं, असार २३ – काठमाडौं महानगरपालिकाकी उपप्रमुख सुनिता डंगोलले महानगरको बजेट प्रक्रिया निष्पक्ष र संयमित ढंगले अघि बढाउन जनप्रतिनिधिहरूलाई आग्रह गरेकी छन्।

संविधानले तोकेको समयसीमाभित्र बजेट नआएको भन्दै चिन्ता व्यक्त गर्दै उनले भावनात्मक प्रतिक्रिया होइन, कानुनी प्रक्रिया र सहकार्यमा आधारित पहल आवश्यक रहेको बताइन्। “आवेगमा होइन, विवेकमा टिकेर बजेट ल्याउने प्रक्रिया अघि बढाऔं,” उपमेयर डंगोलको सन्देशमा भनिएको छ।

यस वर्ष असार १० भित्र बजेट पेस हुनुपर्ने कानुनी प्रावधान भए तापनि, मेयर बालेन शाह र प्रमुख प्रशासकीय अधिकृतबीच देखिएको द्वन्द्वका कारण अझैसम्म न त कार्यपालिका बसेको छ, न नगरसभा।

यही सन्दर्भमा पूर्वराष्ट्रपति विद्यादेवी भण्डारीले समेत मेयर बालेनलाई भेटेर समन्वयका लागि छलफल गरेकी थिइन्।

डंगोलले विग्रहको राजनीति त्यागी सहकार्यमा जोड दिँदै भनिन्, “डुंगा प्वाल पारेर अरूलाई डुबाउने सोचले कसैको हित हुँदैन। हामी सबै मिलेर अघि बढ्नुपर्छ।”

उनको ठम्याइमा, कुनै एकपक्षलाई दोष दिँदै जिम्मेवारीबाट पन्छिन खोज्नु जनताको अपेक्षाविपरीत हो।

डंगोलले प्रमुख प्रशासकीय अधिकृतलाई बैठकबाट बाहिर राखेर नगरसभा बसाल्ने प्रयासप्रति आपत्ति जनाउँदै उनले बैठकमै सहभागी गराई स्पष्ट जवाफ दिन पाउने अधिकार सुनिश्चित हुनुपर्ने बताइन्।

“उहाँ बैठकमा नआए जनप्रतिनिधिका प्रश्नबाट भाग्न खोजिएको भ्रम सिर्जना हुन्छ। त्यो ठीक होइन,” उपमेयर डंगोलको भनाइ छ।

महानगरबासीले विकास र सेवा सुधारको अपेक्षाका साथ निर्वाचित गरेको स्मरण गराउँदै डंगोलले यदि बजेट नै समयमै ल्याउन नसके जनताको विश्वासमाथि ठूलो चोट पुग्ने बताइन्।

“हामी जनताका प्रतिनिधि हौं। हाम्रो कर्तव्यप्रति बेवास्ता भयो भने त्यो काठमाडौंबासीप्रति धोका हुनेछ,” उनले भनिन्।

उपमेयर डंगोलले हालै मेयर, प्रवक्ता र कार्यपालिका सदस्यहरूसँग अनौपचारिक छलफल भएको र बैठक बसाउने दिशामा केही सकारात्मक संकेत देखिएको पनि जानकारी दिइन्।