जनकपुरमा रेलको ठक्करबाट एक जनाको मृत्यु

जनकपुरधाम, असार २३ – जनकपुरबाट जयनगरतर्फ गइरहेको रेलको ठक्करबाट एक पुरुषको मृत्यु भएको छ।

धनुषाको औरही गाउँपालिका–२ देउरी प्रवाहा नजिकैको रेलको लिकमा आज दिउँसो १२:३० बजेतिर रेलको ठक्कर लाग्दा धनुषा जिल्लाको लक्ष्मिनीयाँ गाउँपालिका–२ सिनरजोडाका ४५ वर्षीय विनोद साहको ज्यान गएको जिल्ला प्रहरी कार्यालय धनुषाले जनाएको छ।

प्रहरीका अनुसार मृतक विनोद साह विकरु साहका छोरा हुन्। घटनापछि उनलाई उद्धार गरिए पनि घटनास्थलमै उनको मृत्यु भइसकेको थियो।

प्रहरी प्रवक्ता डिएसपी बरुण बहादुर सिंहले मृतकको शव पोस्टमार्टमका लागि प्रादेशिक अस्पताल जनकपुरमा राखिएको जानकारी दिएका छन्। घटनाको विस्तृत अनुसन्धान भइरहेको प्रहरीको भनाइ छ।