बाल संगठनका बालबालिका र उपसभामुख रानामगरको संस्थामाथि अनुसन्धान

काठमाडौं, भदौ ८ – उपसभामुख इन्दिरा राना मगरसँग जोडिएको संस्थामा पुगेका बालबालिकाबारे प्रहरीले औपचारिक रूपमा अध्ययन सुरु गरेको छ ।

मानव बेचबिखनसम्बन्धी अनुसन्धान गर्ने केन्द्रीय अनुसन्धान ब्यूरो (सीआईबी) मातहतको शाखाले यस विषयमा प्रारम्भिक तथ्य संकलन गरिरहेको सीआईबी प्रमुख एआईजी चन्द्रकुवेर खापुङले जनाएका छन् । ‘प्रश्न उठिसकेपछि के वास्तविकता हो भनेर बुझ्ने प्रक्रिया सुरु गरिएको छ,’ उनले बताए ।

यसअघि २०७७ सालमा नेपाल बाल संगठनका एक अधिकारीलाई बेलायती नागरिकलाई अवैध रुपमा बच्चा दिएको आरोपमा पक्राउ गरिएको थियो । त्यसपश्चात् संगठन र बालमन्दिरमा देखिएका अनियमितताबारे छानबिन गर्न पूर्वन्यायाधीश हरिबाबु भट्टराईको संयोजकत्वमा समिति बनेको थियो ।

उक्त समितिको प्रतिवेदनका अनुसार लामो समय नेपाल बाल संगठनको नेतृत्व गरेकी रीता सिंह वैद्यले बयानमा इन्दिरा रानामगरको संस्थाले कठिनाइ भएको बेला केही बालबालिका राख्ने प्रस्ताव गरेको खुलासा गरेकी थिइन् । वैद्यका अनुसार, ‘खुशी घर’ नामक संस्थामा पठाइएका ३ देखि ५ बालबालिकाले राम्रो सुविधा पाएको र पछि फर्किन नचाहेको पनि उल्लेख गरिएको छ ।

मानव बेचबिखन अनुसन्धान ब्यूरोका एसपी नरेन्द्र कुवँरले पनि बालबालिकाहरू कहाँ छन् र अहिले के स्थितिमा छन् भन्ने विषयमा जानकारी संकलन भइरहेको बताए ।

सत्तारूढ दलले अमेरिकी दूतावाससँग भिसाको मिति माग्ने विषयमा उपसभामुखमाथि उठेको विवादकै बीच यो मुद्दा सार्वजनिक भएको हो । यसले राना मगरको संस्थासँग जोडिएको प्रश्नलाई थप संवेदनशील बनाएको छ ।