उपमेयर डंगोल : “महानगर प्रहरी संस्थाको प्रतिनिधि हुनुपर्छ, व्यक्तिको होइन”

काठमाडौँ, भदौ १४ – काठमाडौँ महानगरपालिकाकी उपमेयर सुनिता डंगोलले महानगर प्रहरीलाई व्यक्तिगत निर्देशमा होइन, संस्थाको प्रतिनिधित्व गर्दै कार्य गर्नुपर्नेमा जोड दिएकी छिन्।

शनिबार राजधानीमा आयोजित ३३ औँ महानगर प्रहरी दिवसको कार्यक्रममा बोल्दै उनले मेयर बालेन्द्र साहको आदेशअनुसार मात्रै काम गर्ने प्रवृत्तिप्रति संकेत गर्दै महानगर प्रहरीलाई कानुनी शासन र संस्थागत मानकअनुसार काम गर्न आग्रह गरिन्।

उनले भनिन्, “महानगर प्रहरी संस्थाको छवि हो। त्यसैले फील्डमा खटिँदा पनि तपाईंहरूले व्यक्तिको प्रतिनिधि नभई संस्थाको प्रतिनिधि भएर खटिनुपर्छ।”

उपमेयर डंगोलले सुशासन कायम गर्नका लागि महानगर प्रहरी स्वयं उदाहरण बन्नुपर्ने आवश्यकता औंल्याउँदै सबैलाई जिम्मेवार र पारदर्शी कार्यशैली अपनाउन आह्वान गरिन्।