संसदमा भ्रामक तथ्याङ्क : हैजाबारे प्रधानमन्त्रीको वक्तव्यमा प्रश्न

काठमाडौं, भदौ १४ – प्रधानमन्त्री केपी शर्मा ओलीले प्रतिनिधिसभामा वीरगन्जमा हैजाबाट तीन जनाको मृत्यु भएको दाबी गरेपछि यसबारे विवाद पैदा भएको छ। पर्सास्थित सम्बन्धित स्वास्थ्य निकायले भने यस्तो मृत्यु नघटेको प्रष्ट पारेका छन्।

शुक्रबारको संसद बैठकमा प्रधानमन्त्री ओलीले वीरगन्जमा हैजा महामारीका कारण ३ जनाको निधन भएको उल्लेख गरेका थिए। तर, स्वास्थ्य कार्यालय पर्सा, नारायणी अस्पताल र इपिडिमियोलोजी तथा रोग नियन्त्रण महाशाखा (इडिसिडिसी) सबैले हालसम्म हैजाबाट कसैको पनि मृत्यु नभएको बताए।

वीरगन्ज महानगरका मेयर राजेशमान सिंहले समेत “हैजाबाट कसैको मृत्यु भएको जानकारी आफूलाई नभएको” बताउँदै प्रधानमन्त्रीलाई कसरी गलत तथ्याङ्क पुग्यो भन्नेमा आश्चर्य व्यक्त गरे।

नारायणी अस्पतालका मेसु डा. चुमनलाल दासका अनुसार अस्पतालमा ल्याइएका मध्ये एक बिरामी ‘ब्राउट डेड’ अवस्थामा आएका थिए तर उनी हैजाबाट नै मृत भएको प्रमाणित छैन। अन्य दुई मृत्यु पनि अन्य कारणले भएको पुष्टि भएको छ।

यस्तै, स्वास्थ्य कार्यालय पर्साका अधिकारीहरूले पनि हैजाका कारण तीन जनाको मृत्यु भएको हल्ला गलत भएको स्पष्ट पारेका छन्।

यसैबीच, स्वास्थ्य कार्यालय पर्साले शनिबार सार्वजनिक गरेको विज्ञप्तिमा जिल्लामा हालसम्म ७१२ जना संक्रमित दर्ता भएको र ५१७ जना निको भइसकेको जनाएको छ। १९५ जना अझै उपचाररत छन् भने ३३ जना आईसीयूमा छन्। हालसम्म १६२ केस हैजा पोजिटिभ देखिएका छन्।

स्वास्थ्य कार्यालयका प्रमुख विनोद झाले सबैलाई सरसफाइमा ध्यान दिन, सफा पिउने पानी मात्र प्रयोग गर्न र लक्षण देखिए स्वास्थ्य संस्थामा तुरुन्त सम्पर्क गर्न आग्रह गरेका छन्।

प्रधानमन्त्री ओली भने संसदमा विवादित तथ्याङ्क प्रस्तुत गरेको भोलिपल्टै चीन भ्रमणका लागि प्रस्थान गरेका छन्।