एमालेको ११औँ महाधिवेशन : प्रतिनिधिहरूका लागि दुई प्रकारका शुल्क निर्धारण

काठमाडौँ, मंसिर ५ – नेकपा एमालेले आगामी मंसिर २७ देखि २९ गतेसम्म आयोजना हुने ११औँ राष्ट्रिय महाधिवेशनका लागि प्रतिनिधि सम्बद्ध शुल्क व्यवस्था सार्वजनिक गरेको छ।

पार्टी सचिवालयको बिहीबार बसेको बैठकले पदेन रूपमा प्रतिनिधि बन्ने व्यक्तिलाई ३ हजार रुपैयाँ र निर्वाचनमार्फत चयन हुने प्रतिनिधिलाई २ हजार रुपैयाँ शुल्क तिर्नुपर्ने निर्णय गरेको हो।

यसअघि प्रस्तुत गरिएको प्रतिनिधि छनोट प्रस्तावमा समेत संशोधन गरिएको छ। संशोधन अनुसार भूगोल, दलित, उपत्यका विशेष तथा सम्पर्क समन्वय अन्तर्गतका निर्वाचन क्षेत्रबाट सदस्य संख्याको ५० प्रतिशतभन्दा बढी ‘शेष संख्या’ भएमा थप एक प्रतिनिधि चयन गर्न सकिने व्यवस्था गरिएको छ।

त्यस्तै, प्रवासी नेपाली संघ भारत तथा प्रवासी नेपाली संघ अन्तर्राष्ट्रिय कमिटीबाट प्रदेश कमिटी समान कम्तीमा पाँच प्रतिनिधि – जसमध्ये दुई महिला अनिवार्य हुने, छानिने निर्णय गरिएको छ। उपत्यका विशेष तथा सम्पर्क समन्वयका जिल्लाहरूमा पनि भौगोलिक जिल्ला कमिटी सरह ४० वर्ष ननाघेका युवाहरूलाई प्राथमिकतासहित १२०० सदस्यभित्र प्रतिनिधि मनोनयन गरिनेछ।

घरफिर्ती अभियानअन्तर्गत विभिन्न वामपन्थी समूहबाट एमालेमा पुनः आवद्ध भएका र ती समूहका केन्द्रीय समितिमा रहेका व्यक्तिलाई विशेष व्यवस्थामा महाधिवेशन प्रतिनिधिका रूपमा मान्यता दिने निर्णय पनि बैठकले गरेको छ।

यी व्यवस्थाले यस वर्षको महाधिवेशनमा प्रतिनिधिहरूको संख्या पहिले अनुमान गरिएको करिब २१२७ भन्दा केही बढ्न सक्ने एमाले नेताहरूको अनुमान छ। पार्टीले मंसिर १३ गते देशभर एकैदिन प्रतिनिधि छनोट गर्ने र महाधिवेशन तयारीका लागि १४ वटा समिति गठन गरेको जनाएको छ।