रास्वपा–विवेकशील साझाबीच आइतबार एकता घोषणा

काठमाडौं, मंसिर १३ – राष्ट्रिय स्वतन्त्र पार्टी (रास्वपा) र विवेकशील साझा पार्टीबीचको धेरै महिना लामो तयारीपछि आइतबार औपचारिक एकता घोषणा हुने भएको छ। दुवै पार्टीको संयुक्त कार्यक्रम दिउँसो २ बजे राष्ट्रिय सभा गृह, प्रदर्शनीमार्गमा आयोजना गरिएको छ।

विवेकशील साझाको केन्द्रीय समितिले गत बुधबार बसेको बैठकमा रास्वपासँग एकीकृत हुने प्रस्ताव सर्वसम्मत पारित गरेको थियो। निर्णयअनुसार अनौपचारिक छलफललाई अन्तिम रूप दिँदै पार्टीले रास्वपाको नाम, नेतृत्व र चुनाव चिन्ह स्वीकार गर्दै निसर्त एकता गर्ने निर्णय लिएको हो।

अध्यक्ष समीक्षा बाँस्कोटा र नेतृ रञ्जु दर्शनाले एकता प्रक्रियाले नयाँ राजनीतिक विकल्पको आवश्यकता पुरा गर्ने विश्वास व्यक्त गरेका छन्। उनीहरूका अनुसार, युवा र सुधारवादी राजनीतिक धारलाई सुदृढ गर्दै रास्वपामा समाहित हुने सहमति बनेको हो।

कार्यक्रममा दुबै दलका शीर्ष नेता, कार्यकर्ताको उपस्थिति रहने र एकता घोषणासँगै संयुक्त राजनीतिक यात्राको रोडम्याप सार्वजनिक गर्ने तयारी गरिएको बताइएको छ।