कालीकोटमा पत्रकार आचार्यको निधनपछि शंका र आक्रोश, पीडित पक्ष आन्दोलनमा

कालीकोट, मंसिर १३ – पत्रकार वीरेन्द्र आचार्यको निधनसँग सम्बन्धित सडक दुर्घटनालाई शंकास्पद मानेपछि आफन्त तथा स्थानीय युवाहरू आन्दोलित भएका छन्।

प्रेस सेन्टर नेपाल कालीकोटका अध्यक्ष तथा रेडियो तिला आवाजका स्टेसन म्यानेजरसमेत रहेका आचार्यको शुक्रबार राति मोटरसाइकलसँग ठोक्किएर मृत्यु भएको प्रहरीले जनाएको छ। तर घटनाको प्रकृतिमा ‘षड्यन्त्रको संकेत’ रहेको भन्दै पीडित परिवारले घटनाको निष्पक्ष जाँचको माग गरेका छन्।

आचार्य सुर्खेत–वीरेन्द्रनगर नगरपालिका–२ भुरेली हुँदै मूलपानीतर्फ स्कुटरमा फर्किंदै गर्दा विपरीत दिशाबाट तीव्र गतिमा आएको मोटरसाइकलले बीच सडक पार गरी ठोक्किएको आफन्त भीमप्रसाद आचार्यले बताए। उनका अनुसार घटना स्थलमा प्रहरीले पुग्नु अघि नै स्थानीयले रगत धुने काम गरेको देखिएपछि प्रमाण नष्ट गरिएको आशंका थप बलियो बनेको हो।

“उद्देश्यपूर्ण ढंगले दुर्घटना जस्तो बनाइएको छ। हामी शान्तिपूर्ण आन्दोलनमा छौं, तर न्याय नदिइने हो भने कडा कदम चाल्न बाध्य हुनेछौं,” भीमप्रसादले भने।

कर्णाली प्रदेश ०२-००३ प १७४४ नम्बरको मोटरसाइकल चालक २३ वर्षीय यामबहादुर शाही र आचार्य सवार लुम्बिनी प्रदेश ३६ प ३८८६ नम्बरको स्कुटर आपसमा ठोक्किएपछि दुर्घटना भएको प्रहरीको भनाइ छ। दुर्घटनापछिको क्षणमा गम्भीर घाइते भएका ३४ वर्षीय आचार्यलाई कर्णाली प्रदेश अस्पतालमा उपचारका लागि भर्ना गरिएको थियो। तर उपचारकै क्रममा उनको मृत्यु भयो।

दुर्घटनाभन्दा बढी नियोजित हमला जस्तो देखिएको भन्दै मृतकका आफन्तले मूलपानी चोक, एरिचोक र भुरेली क्षेत्र नजिकै टायर बालेर सडक अवरुद्ध गर्दै प्रदर्शन गरेका छन्। उनीहरूले घटनाको छानबिन पारदर्शी र निष्पक्ष हुनुपर्ने, दोषीलाई कारबाही गर्नुपर्ने र पत्रकार आचार्यका परिवारलाई यथोचित क्षतिपूर्ति दिनुपर्ने माग राखेका छन्।

प्रहरीले सडक अवरोध हटाउने प्रयास गरे पनि प्रदर्शनकारीहरू न्याय सुनिश्चित नहुँदासम्म आन्दोलन जारी राख्ने अडानमा छन्।