रास्वपासँग पार्टी एकता गर्ने निर्णयले विवेकशील साझामा असन्तोष

काठमाडौँ, मंसिर १४ – राष्ट्रिय स्वतन्त्र पार्टी (रास्वपा)सँग एकीकरण गर्ने हालैको निर्णयलाई लिएर विवेकशील साझा पार्टीभित्र तीव्र असन्तुष्टि प्रकट भएको छ। मंसिर १० गते बसेको केन्द्रीय समितिको बैठकले एकता प्रक्रियालाई अघि बढाउने निर्णय गरे पनि सो निर्णयलाई पार्टीभित्रका महत्वपूर्ण नेताहरूले आपत्ति जनाएका छन्।

विवेकशील नेपाली पृष्ठभूमिबाट आएका नेताहरूले एकीकरणलाई आफूहरूको मूल विचारधारा र संगठनको भविष्यसँग मेल नखाने भन्दै विरोध व्यक्त गरेका छन्। पार्टीका उपाध्यक्ष तथा पुराना नेता मिलन पाण्डेले सामाजिक सञ्जालमार्फत एकताप्रति असहमति जनाउँदै केही समय ‘कुलिङ पिरियड’ लिने घोषणा गरेका छन्। उनले आफू यस प्रक्रियामा सहभागी नभएको स्पष्ट गर्दै भविष्यमा नयाँ ढंगबाट राजनीतिक यात्रा सुरु गर्ने संकेत दिएका छन्।

पार्टीका अन्य नेताहरू पनि असहमतिको पक्षमा उभिएका छन्। तत्कालीन विवेकशील नेपालीका महासचिव रञ्जु दर्शना भने बाध्यतावश एकता प्रक्रियामा संलग्न भएको दाबी गरिएको छ। तर अन्य प्रमुख नेता—रमेश पौडेल, सरोज गौतम, योजनराज भण्डारी लगायत—यस एकीकरणबाट टाढा रहेका बुझिन्छ।

विवेकशील साझा पार्टीका एक नेताले भने, “भ्रष्टाचार र बेथिति विरुद्धको लडाइँले हामीलाई एकीकृत गरेको थियो। वैकल्पिक राजनीतिको उद्देश्यमा ढिलाइ नभए पनि संस्थापक र धेरै नेताहरू यस एकतालाई समर्थन गर्दैनन्।” उनका अनुसार रञ्जु दर्शनाले पनि सहमति नभए पनि संगठनात्मक जिम्मेवारीका कारण एकता प्रक्रियाबाट अलग हुन नसकेको अवस्था रहेको छ।

विवेकशील साझा पार्टीको निर्माण तत्कालीन विवेकशील नेपाली र साझा पार्टी एकीकृत भएर भएको थियो। तर, एकता पछि समय–समयमा आन्तरिक विवाद र फुटका कारण पार्टी कमजोर हुँदै गयो। संस्थापक उज्ज्वल थापाले १२ वर्षअघि वैकल्पिक राजनीतिको उद्देश्यसहित स्थापना गरेको विवेकशील पार्टी अहिले पुनः एकताका कारण आफ्नो अस्तित्व गुमाउने मोडमा पुगेको छ।

रास्वपा र विवेकशील साझाबीचको एकता घोषणा आइतबार दिउँसो ३ बजे सार्वजनिक गरिने कार्यक्रम छ।