चितवनमा रविलाई जेनजी आन्दोलनबारे जिज्ञासा, ‘कैदी निकाल्न नेतृत्व गर्नुभयो?’

काठमाडौं, माघ ४ – राष्ट्रिय स्वतन्त्र पार्टी (रास्वपा)का सभापति रवि लामिछानेलाई चितवनमा घरदैलो कार्यक्रमका क्रममा ‘जेनजी आन्दोलन’सँग जोडिएको नख्खु कारागार प्रकरणबारे मतदाताले प्रत्यक्ष प्रश्न गरेका छन्।

चितवन निर्वाचन क्षेत्र नम्बर २ मा सोमबार मतदाता भेटघाट गरिरहेका बेला एक स्थानीय वृद्धले आन्दोलनको समयमा कारागारबाट कैदी निस्किएको विषय उठाउँदै त्यसमा लामिछानेको भूमिका के थियो भन्ने जिज्ञासा राखे। उनले बाहिर चर्चामा आएझैँ लामिछानेले नै नेतृत्व गरेको हो कि होइन भनेर स्पष्ट पार्न आग्रह गरेका थिए।

जवाफ दिँदै लामिछानेले आफूविरुद्ध लगाइएको आरोपबारे छानबिन भइसकेको दाबी गरे। उनका अनुसार पूर्वन्यायाधीश गौरीबहादुर कार्कीको नेतृत्वमा बनेको जाँचबुझ आयोगसमक्ष उनले बयान दिएका छन् र आयोगले समेत आफूलाई दोषी नठहर्याएको संकेत गरिसकेको छ।

“जेलभित्र सीमित अवस्थामा रहेको व्यक्तिले बाहिरको गतिविधि सञ्चालन गर्न सम्भव हुँदैन,” उनले भने, “आयोगमा गएर सबै तथ्य प्रस्तुत गरेको छु, प्रतिवेदन सार्वजनिक भएपछि सत्य प्रष्ट हुनेछ।”

लामिछानेले जेल प्रशासनका अधिकारीहरूको बयानले पनि आफू निर्दोष रहेको पुष्टि गर्ने विश्वास व्यक्त गरे। चुनावी माहोल तातिरहेका बेला उठेको यो विषयले चितवनमा राजनीतिक बहसलाई थप तीव्र बनाएको छ।