राप्रपा राजसंस्थाप्रति आस्था राख्नेहरूको राजनीतिक मंच हो : लिङ्देन

काठमाडौं, वैशाख १३ – राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राप्रपा राजाको पार्टी नभई राजसंस्था मान्ने नागरिकहरूको राजनीतिक मंच भएको बताएका छन्। उनले राजसंस्था कुनै दलको मातहतमा नपर्ने उल्लेख गर्दै त्यसलाई पार्टीसँग जोडेर व्याख्या गर्नु गलत भएको धारणा राखे।

तनहुँमा आयोजित गण्डकी प्रदेशस्तरीय निर्वाचन समीक्षा कार्यक्रममा बोल्दै उनले राप्रपाले सम्वर्द्धनवादी सोच बोकेको स्पष्ट पारे। उनका अनुसार राजसंस्था कुनै एक विचार वा संगठनभन्दा माथि रहने भएकाले यसलाई पार्टीगत ढाँचामा सीमित गर्न नमिल्ने बताए।

लिङ्देनले राप्रपालाई राजाको दल भन्दै आलोचना गर्नेहरूलाई लक्षित गर्दै यस्तो प्रचारले राजसंस्थाको वास्तविक भावना नबुझिएको टिप्पणी गरे। उनले सरकारमा नजाँदैमा पार्टी कमजोर हुने तर्क गलत भएको उल्लेख गर्दै अन्य साना दलहरूको उदाहरण प्रस्तुत गरे।

पार्टीभित्र देखिएको असन्तुष्टिबारे उनले अनुशासन उल्लंघन गर्नेहरूमाथि कारबाही प्रक्रिया अघि बढाइएको जानकारी दिए। उनले चुनावअघि सबैलाई मिलाएर लैजाने प्रयास भए पनि केही नेताहरूले त्यसलाई कमजोरी ठानेर अनुशासनविपरीत गतिविधि गरेको बताए।

राप्रपाले प्रदेशस्तरमा निर्वाचन समीक्षा अभियान जारी राखेको छ। हालसम्म मधेश, कोशी र गण्डकी प्रदेशमा कार्यक्रम सम्पन्न भइसकेको छ भने आगामी दिनमा लुम्बिनी, बागमती र सुदूरपश्चिम प्रदेशमा समीक्षा बैठक तय गरिएको छ। कर्णाली प्रदेशको कार्यक्रम भने अझै तय हुन बाँकी रहेको जनाइएको छ।