हर्क साम्पाङको सरकारलाई खुला चेतावनी : ‘नसक्ने भए सत्ता छोड्नुस्’

काठमाडौं, वैशाख २२ – श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङले सरकारको कार्यशैलीप्रति असन्तुष्टि व्यक्त गर्दै खुला पत्रमार्फत कडा आलोचना गरेका छन्। उनले सरकार जनताप्रति जिम्मेवार बन्न नसकेको आरोप लगाउँदै संवेदनशील विषयमा मौन बसेको बताएका छन्।

उनले सीमा सुरक्षालाई मुख्य मुद्दा बनाउँदै लिपुलेक क्षेत्रमा भइरहेको गतिविधिप्रति सरकारको निष्क्रियता प्रश्न गरेका छन्। भारतले कैलाश–मानसरोवर मार्ग निर्माण गरिरहँदा केवल कूटनीतिक नोट पठाएर टार्ने प्रयास गरिएको भन्दै उनले ठोस पहलको माग गरेका छन्। साथै, उनले नेपाल, भारत, चीन र संयुक्त राष्ट्र संघबीच बहुपक्षीय वार्ता गर्नुपर्ने प्रस्ताव अघि सारेका छन्।

साम्पाङले नेपाली सेनाको भूमिकामाथि पनि प्रश्न उठाउँदै सेना सीमामा भन्दा अन्यत्र प्रयोग भइरहेको बताएका छन्। सीमा अतिक्रमण रोक्न सेनालाई प्रभावकारी रूपमा परिचालन गर्नुपर्ने उनको धारणा छ।

सुकुमबासी बस्तीमाथि भइरहेको डोजर प्रयोगप्रति असन्तुष्टि जनाउँदै उनले सरकारको प्राथमिकता गलत दिशामा गएको टिप्पणी गरेका छन्। विपद् प्रभावित क्षेत्रहरूमा पुनर्निर्माण र राहतमा ध्यान दिनुपर्ने उनले सुझाएका छन्।

अर्थतन्त्र कमजोर बन्दै गएको उल्लेख गर्दै उनले विदेशी ऋणको भार बढ्दै गएकोप्रति चिन्ता व्यक्त गरेका छन्। देशलाई सन्तुलित रूपमा अघि बढाउन नसक्ने हो भने सरकारले पद छोड्नुपर्ने उनको स्पष्ट सन्देश छ।

उनले बजेट निर्माणमा जनताका वास्तविक समस्या समेट्न र सरकारी कामकारबाहीबारे पारदर्शी रूपमा जानकारी दिन सरकारलाई आग्रह गरेका छन्।