भिडियो विवादपछि सांसद सृष्टि भट्टराईको प्रतिक्रिया: ‘गल्तीबाट सिकेकी छु’

काठमाडौं, असार २ – सामाजिक सञ्जालमा भाइरल बनेको एक पुरानो भिडियोका कारण चर्चामा आएकी राष्ट्रिय स्वतन्त्र पार्टी (रास्वपा) की सांसद सृष्टि भट्टराईले आफ्नो धारणा सार्वजनिक गर्दै भविष्यमा यस्ता गतिविधि नदोहोर्‍याउने बताएकी छन्।

कारको झ्यालबाट बाहिर निस्किएर रमाइरहेको दृश्य समेटिएको भिडियो मंगलबारदेखि सामाजिक सञ्जालमा तीव्र रूपमा फैलिएको थियो। भिडियोप्रति विभिन्न प्रतिक्रिया आउन थालेपछि भट्टराईले सामाजिक सञ्जालमार्फत स्पष्टीकरण दिएकी हुन्।

उनले उक्त भिडियो आफ्नो सांसद बन्नुअघिको व्यक्तिगत जीवनसँग सम्बन्धित रहेको उल्लेख गर्दै त्यसलाई वर्तमान सार्वजनिक जिम्मेवारीसँग जोडेर हेर्न नहुने बताइन्। भिडियो कुनै सरकारी कार्यक्रम वा औपचारिक भूमिकाको क्रममा खिचिएको नभई व्यक्तिगत यात्राको क्रममा कैद भएको उनको भनाइ छ।

भट्टराईले सार्वजनिक पदमा रहेकाहरूको गतिविधिप्रति नागरिकको चासो स्वाभाविक भए पनि निजी जीवनका सामान्य घटनालाई सन्तुलित ढंगले बुझिनुपर्ने धारणा व्यक्त गरेकी छन्। उनले आफू पनि अन्य नागरिकसरह निजी जीवन र व्यक्तिगत स्वतन्त्रताको अधिकार राख्ने बताएकी छन्।

यद्यपि, भिडियोमा देखिएको व्यवहार ट्राफिक नियम तथा सडक सुरक्षाको दृष्टिले उपयुक्त नदेखिन सक्ने स्वीकार गर्दै उनले त्यसबाट शिक्षा लिएको जनाएकी छन्। भविष्यमा यस्ता गतिविधि नदोहोर्याउने व्यहोरा व्यक्त गर्दै उनले सबैलाई ट्राफिक नियमको पालना गर्न र सुरक्षित यात्रामा ध्यान दिन आग्रह गरेकी छन्।

सांसद भट्टराईले घटनालाई आलोचनाको विषयभन्दा पनि सडक सुरक्षाबारे थप सचेत बन्ने अवसरका रूपमा लिनुपर्ने बताएकी छन्।