चितवनमा रास्वपाको शक्ति प्रदर्शन, रवि–बालेन–गगन एउटै मञ्चमा

चितवन, असार ७ – राष्ट्रिय स्वतन्त्र पार्टी (रास्वपा) ले आफ्नो पहिलो राष्ट्रिय महाधिवेशन आइतबार चितवनबाट औपचारिक रूपमा प्रारम्भ गरेको छ। भरतपुरस्थित गेष्टहाउस चौरमा आयोजित उद्घाटन समारोहमा विभिन्न राजनीतिक दलका शीर्ष नेताहरूको सहभागिता देखिएको थियो।

महाधिवेशनको उद्घाटन रास्वपा सभापति रवि लामिछाने र काठमाडौं महानगरपालिकाका प्रमुख बालेन्द्र शाहले संयुक्त रूपमा घण्टी बजाएर गरेका थिए। कार्यक्रममा उपस्थित अन्य राजनीतिक दलका नेताहरूले समेत घण्टी बजाउँदै महाधिवेशनको सफलताको शुभकामना व्यक्त गरेका थिए।

उद्घाटन समारोहमा नेपाली कांग्रेसका महामन्त्री गगनकुमार थापा, नेकपा एमालेका प्रदीप ज्ञवाली, नेकपा (माओवादी केन्द्र) का वर्षमान पुन, पूर्वप्रधानमन्त्री बाबुराम भट्टराई तथा राप्रपा अध्यक्ष राजेन्द्र लिङ्देनलगायत नेताहरू सहभागी भएका थिए।

रास्वपाले महाधिवेशनमा ४ हजार २११ प्रतिनिधिको सहभागिता रहेको जनाएको छ। महाधिवेशनको बन्दसत्रमा पार्टीको आगामी राजनीतिक दिशा, आर्थिक नीति, संगठनात्मक संरचना र विधान संशोधनसम्बन्धी विषयमा व्यापक छलफल हुने कार्यक्रम रहेको छ।

यस्तै, नयाँ केन्द्रीय नेतृत्व चयनका लागि निर्वाचन प्रक्रिया समेत अघि बढाइएको र त्यससम्बन्धी कार्यतालिका सार्वजनिक गरिसकिएको पार्टीले जनाएको छ। रास्वपाको यो महाधिवेशनलाई पार्टीको भावी नेतृत्व र संगठनात्मक संरचना तय गर्ने महत्वपूर्ण अवसरका रूपमा हेरिएको छ।