सोमबारदेखि सञ्चालनमा आउँदै नागढुंगा–सिस्नेखोला सुरुङमार्ग, सात वर्षपछि पूरा भयो बहुप्रतीक्षित आयोजना

काठमाडौं, साउन १० – काठमाडौं उपत्यकाको प्रवेशद्वार मानिने नागढुंगा क्षेत्रमा निर्माण गरिएको नागढुंगा–सिस्नेखोला सुरुङमार्ग सोमबारदेखि औपचारिक रूपमा सञ्चालनमा आउने भएको छ। करिब सात वर्षअघि सुरु गरिएको यो राष्ट्रिय गौरवको आयोजना करिब २९ अर्ब रुपैयाँको लागतमा सम्पन्न भएको हो।

तत्कालीन प्रधानमन्त्री केपी शर्मा ओलीले २०७६ कात्तिक ४ गते शिलान्यास गरेको यो आयोजना विभिन्न अवरोधका कारण निर्धारित समयमै पूरा हुन सकेन। कोरोना महामारी, मुआब्जा विवाद तथा अन्य प्राविधिक चुनौतीका कारण निर्माण कार्य लम्बिएको थियो।

आयोजनाअन्तर्गत २.६८ किलोमिटर लामो मुख्य सुरुङ र २.५५७ किलोमिटरको आपतकालीन उद्धार सुरुङ निर्माण गरिएको छ। २०८० साउनमा रेस्क्यु सुरुङको ‘ब्रेकथ्रु’ सम्पन्न भएपछि मुख्य सुरुङको काम तीव्र बनाइएको थियो। अन्ततः २०८१ असारमा मुख्य सुरुङ पनि आरपार जोडिएको थियो।

यो परियोजना नेपाल सरकार र जापान सरकारको संयुक्त लगानीमा निर्माण गरिएको हो। लागत बढेपछि जापानले थप ऋण सहायता उपलब्ध गराएको थियो भने निर्माणको जिम्मेवारी जापानी कम्पनी हाज्मा आन्दो कर्पोरेसनले पूरा गरेको हो।

सुरुङमार्ग उद्घाटनको पहिलो दिन सबै सवारीसाधनलाई प्रवेश दिइने छैन। प्रारम्भमा आपतकालीन सेवामा प्रयोग हुने सवारीलाई मात्र अनुमति दिइनेछ। त्यसपछि चरणबद्ध रूपमा निजी तथा सार्वजनिक सवारी सञ्चालन गरिनेछ। मोटरसाइकल, स्कुटर, साइकल, पैदलयात्री तथा पेट्रोलियम वा अन्य प्रज्वलनशील पदार्थ बोकेका सवारीलाई भने सुरुङमार्ग प्रयोग गर्न अनुमति नहुने व्यवस्था गरिएको छ।

सुरुङमार्ग प्रयोग गर्न सवारीका प्रकारअनुसार शुल्क लाग्नेछ। कार र भ्यानका लागि काठमाडौं प्रवेश गर्दा ६५ रुपैयाँ तथा बाहिरिँदा ६० रुपैयाँ शुल्क तोकिएको छ। मिनीबस, टिपर, बस, ट्रक र हेभी ट्रकका लागि पनि छुट्टाछुट्टै दर निर्धारण गरिएको सरकारले जनाएको छ।

सरकारको अपेक्षाअनुसार सुरुङमार्ग सञ्चालनमा आएपछि नागढुंगा सडकखण्डको लामो ट्राफिक जाममा उल्लेख्य कमी आउने, यात्रा समय छोटिने तथा काठमाडौं–धादिङ आवतजावत थप सुरक्षित र सहज बन्ने विश्वास गरिएको छ।