पूर्वराजा ज्ञानेन्द्रको ७९औँ जन्मोत्सव, शुभेच्छुकका लागि निर्मल निवास खुला

काठमाडौं, असार २३ – पूर्वराजा ज्ञानेन्द्र शाहले सोमबार आफ्नो ७९औँ जन्मोत्सव पारिवारिक तथा सार्वजनिक रूपमा मनाएका छन्। जन्मदिनको अवसरमा राजधानीको महाराजगञ्जस्थित निर्मल निवास सर्वसाधारणको लागि खुला गरिएको थियो।

पूर्वराजाको संवाद सचिवालयका अनुसार, बिहान ११ बजेदेखि दिउँसो २ बजेसम्म निर्मल निवासमा शुभकामना अर्पण कार्यक्रमको आयोजना गरिएको थियो। सो अवधिमा विभिन्न संघसंस्था, राजसंस्था समर्थक समूहहरू तथा आम नागरिकहरू पूर्वराजालाई शुभकामना दिन निवास परिसरमा लामबद्ध देखिएका थिए।

शुभेच्छुकहरूको बाक्लो उपस्थिति रहेको कार्यक्रम शान्तिपूर्ण वातावरणमा सम्पन्न भएको थियो। जन्मोत्सवको अवसरमा निर्मल निवासमा कुनै औपचारिक समारोहको आयोजना नभए पनि नागरिकहरूको उत्साहले माहोल भव्य बनेको देखिएको थियो।