कमल थापा भन्छन्: “राजसंस्था र हिन्दु राष्ट्रलाई विदेशीको इसारामा एम्बुसमा पारियो”

काठमाडौं, साउन २३ – राप्रपा नेपालका अध्यक्ष कमल थापाले देशको मौलिक पहिचानमाथि विदेशी हस्तक्षेप भएको आरोप लगाएका छन्। शुक्रबार आयोजित पार्टी प्रवेश कार्यक्रममा बोल्दै उनले राजसंस्था र हिन्दु राष्ट्रलाई नियोजित रूपमा विदेशी शक्तिहरूको इसारामा एम्बुसमा पारिएको दाबी गरे।

थापाले विदेशी प्रभावमा जबरजस्ती लादिएको संघीयता नेपाली जनताको अभिमतविपरीत भएको जिकिर गर्दै भने, “सङ्घीयताको नाममा मुलुकले सेतो हात्ती पालिरहेको छ।” उनका अनुसार २०६२/०६३ को आन्दोलनका समयमा विदेशी हस्तक्षेप उनले नजिकबाट देखेको अनुभव रहेको छ।

राजनीतिक क्षेत्रमा अहिले भ्रष्टाचार, सिद्धान्तहीनता र नौटंकीको बोलबाला रहेको बताउँदै थापाले देशको समृद्धि र स्वाधीनताका लागि सम्वर्द्धनवादको बाटो नै अन्तिम विकल्प भएको प्रस्ट पारे। उनले राप्रपा नेपाललाई वैकल्पिक राष्ट्रवादी प्रजातान्त्रिक शक्तिका रूपमा स्थापित गर्न आफू उच्च मनोबलका साथ क्रियाशील रहेको उल्लेख गरे।

पार्टीमा प्रवेश गरेका नयाँ सदस्यहरूलाई स्वागत गर्दै अध्यक्ष थापाले डा. बालकृष्ण दाहाल, डा. सुदर्शन सुबेदी, अर्थशास्त्री प्रकाश थापा, कृषि विज्ञ अश्विन आचार्य, विष्णु तिवारी लगायतका विशिष्ट व्यक्तित्वहरूलाई पार्टीमा भित्र्याएका छन्।

थापाले राप्रपा नेपालको राष्ट्रवादी विचारधारामार्फत मात्र देशलाई सही मार्गमा लैजान सकिने विश्वास व्यक्त गरे।