रास्वपाको प्रथम महाधिवेशन उद्घाटन सत्रमा गगन थापा सहभागी हुने

काठमाडौं, असार ७ – राष्ट्रिय स्वतन्त्र पार्टी (रास्वपा) को प्रथम महाधिवेशनको उद्घाटन समारोहमा नेपाली कांग्रेसका महामन्त्री गगन थापा सहभागी हुने भएका छन्।

गगन थापाका स्वकीय सचिव शंकर कुइँकेलका अनुसार थापा आज चितवन पुगेर महाधिवेशन उद्घाटन कार्यक्रममा सहभागी हुने कार्यक्रम रहेको छ। रास्वपाले आफ्नो पहिलो महाधिवेशनका लागि विभिन्न राजनीतिक दलका प्रमुख नेताहरूलाई निमन्त्रणा दिएको छ।

महाधिवेशनअघि गगन थापाले रास्वपा र पार्टी सभापति रवि लामिछानेलाई शुभकामना व्यक्त गर्दै सन्देश जारी गरेका थिए। उनले छोटो समयमै रास्वपाले उल्लेखनीय जनसमर्थन हासिल गर्दै राष्ट्रिय राजनीतिमा प्रभावशाली उपस्थिति स्थापित गर्न सफल भएको बताएका छन्।

थापाले महाधिवेशनले पार्टीलाई वैचारिक, सांगठनिक र नीतिगत रूपमा अझ परिपक्व बनाउने विश्वास व्यक्त गरेका छन्। लोकतान्त्रिक मूल्य, संविधानप्रदत्त अधिकारको संरक्षण तथा जवाफदेहितालाई सुदृढ बनाउन महाधिवेशनले नयाँ ऊर्जा प्रदान गर्ने उनको अपेक्षा छ।

रास्वपाको महाधिवेशन उद्घाटन समारोहमा नेकपा एमालेका नेता प्रदीप ज्ञवाली, नेकपा (माओवादी केन्द्र) का नेता वर्षमान पुन तथा राष्ट्रिय प्रजातन्त्र पार्टीका अध्यक्ष राजेन्द्र लिङ्देन पनि सहभागी हुने जनाइएको छ।

यसैबीच, रास्वपाका वरिष्ठ नेता बालेन शाह समेत महाधिवेशनमा सहभागी हुन चितवन पुगिसकेका छन्। महाधिवेशनमा विभिन्न राजनीतिक दलका नेताहरूको उपस्थितिले कार्यक्रमलाई थप महत्त्वपूर्ण बनाउने अपेक्षा गरिएको छ।